Tāpaita, ko ha Fefine “Naʻe Faʻa Fai … ʻa e Ngaahi Ngāue Lelei”
Naʻe toe fakamoʻui ʻi he mālohi ʻo Sīsū Kalaisí
Ko Tāpaitá ko ha ākonga faitotonu ia ʻo Sīsū Kalaisi. Naʻá ne nofo ʻi ha kolo ʻi he veʻe tahí, ko Sopa. Naʻá ne manako ke ngāue mo tokoni ki he kakai naʻe masivá.
Naʻe ngaohi ʻe Tāpaita ha ʻū vala pea foaki ia ki he kau fafine faingataʻaʻiá. Naʻa nau ʻofa ʻia Tāpaita.
ʻI ha ʻaho ʻe taha, naʻe puke lahi ʻa Tāpaita. Naʻá ne puke lahi ʻaupito naʻá ne siʻi mālōlō ai.
Naʻe loto-mamahi ʻaupito ʻa e kāingalotu kehe ʻo e Siasí ʻi Sopá. Naʻa nau ʻiloʻi naʻe ʻi ha kolo ofi mai pē ʻa Pita, ko e taha ʻo e kau ʻAposetolo ʻa Sīsuú. Naʻa nau fekau ha ongo tangata ke na kole kia Pita ke fakavavevave ʻo haʻu kiate kinautolu.
Naʻe haʻu ʻa Pita ki he feituʻu naʻe ʻi ai ʻa e sino ʻo Tāpaitá. Naʻe ʻi ai ha niʻihi ʻo e kau fafine naʻe tokoniʻi ʻe Tāpaitá. Naʻa nau fakaʻaliʻali kia Pita ʻa e vala naʻá ne ngaohi maʻanautolú.
Naʻe kole ʻe Pita ki he kakaí kotoa ke nau mavahe mei he lokí. Naʻá ne tūʻulutui hifo ʻo lotu.
Hili ʻa e lotú, naʻe lea ʻa Pita, “Tāpaita, tuʻu hake.” Naʻá ne ʻāʻā ʻo tangutu hake. Naʻe tokoni ʻa Pita kia Tāpaita ke tuʻu. Naʻe toe moʻui ia! Naʻe ui ʻe Pita hono ngaahi kaungāmeʻá ke nau omi ʻo mamata kiate ia. Naʻa nau ofo! Naʻa nau ʻiloʻi naʻe toe fakamoʻui ia ʻi he mālohi ʻo Sīsū Kalaisí. Naʻe tui ha kakai tokolahi ange kiate Ia.