ʻOku Fakafiemālieʻi ʻe Sīsū ha Ongo Ākonga

ʻI he ʻaho naʻe toetuʻu ai ʻa Sīsuú, naʻe lue ha ongo ākonga ʻe toko ua mei Selusalema ki ha kolo naʻe ui ko ʻEmeasi. Ko ha ongo muimui kinaua ʻo Sīsū, pea naʻá na loto mamahi. Naʻá na fepōtalanoaʻaki fekauʻaki mo e pekia ʻa Sīsuú mo e ngaahi meʻa kehe kuo hoko ʻi he ngaahi ʻaho siʻi kuo hilí.

Luke 24:13–14

Lolotonga ʻena lué, naʻe hāʻele mai ʻa Sīsū ʻo ʻaʻeva mo kinaua, ka naʻe ʻikai ke na ʻiloʻi ko Sīsū ia. Naʻá Ne fehuʻi ange pe ko e hā e meʻa naʻá na talanoa ki aí mo e ʻuhinga ʻo ʻena loto mamahí.

Luke 24:15–17

Naʻá na ʻohovale he ʻikai ke Ne ʻafioʻi e meʻa kuo hokó. Naʻá na talaange kiate Ia fekauʻaki mo Sīsū. Naʻá na fakakaukau te Ne hoko ko honau Fakamoʻuí, ka kuo pekia Ia.

Luke 24:18–21

Naʻá na pehē foki kuo ō atu ha kau fafine ʻe niʻihi ki Hono fonualotó, ka kuo puli e sino ia ʻo Sīsuú. Kuo talaange ʻe ha ongo ʻāngelo ki he kau fafiné ʻoku moʻui ʻa Sīsū.

Luke 24:21–24

Naʻe akoʻi leva ʻe Sīsū kinaua fekauʻaki mo e meʻa ʻoku tala ʻe he folofolá fekauʻaki mo e Fakamoʻuí. Naʻá Ne folofola ange kuo akoʻi ʻe he kau palōfitá ʻe pekia ʻa e Fakamoʻuí pea toe tuʻu.

Luke 24:25–27

ʻI heʻenau aʻu ki ʻEmeasí, naʻe fakaʻau ke poʻuli. Naʻe fakaafeʻi ʻe he ongo ākongá ʻa Sīsū ke nofo mo kinaua. Naʻe ʻafio hifo ʻa Sīsū ʻo ne taumafa mo kinaua. Naʻá Ne toʻo ʻa e maá, tāpuakiʻi ia, pea ʻoatu ia ki he ongo ākongá. ʻI he momeniti ko iá, naʻá na ʻilo ko Sīsū ia. Fakafokifā pē, naʻe pulia Ia.

Luke 24:29–31

Naʻe talanoa ʻa e ongo ākongá fekauʻaki mo e ongo māfana naʻá na ongoʻi ʻi hona lotó lolotonga hono akoʻi kinaua ʻe Sīsū mei he folofolá. Naʻá na foki fakavavevave ki Selusalema ke talaange ki he kau ākonga kehé kuó na mamata kia Sīsū.

Luke 24:32–35