Ko e Talanoa Fakatātā ʻo e Samēlia Leleí
ʻOfa ki hotau kaungāʻapí ʻo hangē pē ko ʻetau ʻofa ʻiate kitautolú
Naʻe fehuʻi ʻe ha loea kia Sīsū pe ʻe anga fēfē hono maʻu ʻo e moʻui taʻengatá. Naʻe ʻeke ange ʻe Sīsū kiate ia pe ko e hā ʻoku tohi ʻi he folofolá. Naʻe tali ange ʻe he loeá ʻoku tala ʻe he folofolá ke ʻofa ki he ʻOtuá pea ʻofa ki hotau kaungāʻapí. Naʻe talaange ʻe Sīsū ʻokú ne lea totonu. Ka naʻe ʻeke ange ʻe he loeá, “Ko hai hoku kaungāʻapí?” Naʻe tali ia ʻe Sīsū ʻaki hano fai ha talanoa fakatātā pe talanoa.
ʻI he talanoa fakatātaá, naʻe fononga ha tangata Siu ʻi he hala mei Selusalema ki Selikoó. Naʻe fakafokifā e hoko mai ha kau kaihaʻa. Naʻa nau vete hono ngaahi kofú, fakalaveaʻi lahi ia, pea tuku ia ai.
Ne ʻikai fuoloa mei ai, kuo hifo mai ha taulaʻeiki ʻi he halá. Ko e taulaʻeikí ko ha tokotaha ʻoku ngāue ʻi he temipalé. Naʻá ne mamata ki he tangata ʻi he veʻe halá ka naʻá ne fakalaka atu ʻi he tafaʻaki ʻe tahá.
Naʻe hoko mai leva mo ha tangata ʻe taha naʻe ngāue foki ʻi he temipalé, naʻe ui ko ha Līvaite. Naʻá ne mamata ki he tangata kafó, ka naʻá ne fakalaka atu foki ʻi he tafaʻaki ʻe taha ʻo e halá.
Pea naʻe hoko mai ha Samēlia. Naʻá ne ʻiloʻi naʻe kafo lahi ʻaupito ʻa e tangata ʻi he veʻe halá. Naʻe ʻikai faʻa feohi lelei ʻa e kau Samēliá mo e kau Siú. Ka naʻe fie tokoniʻi pē ʻe he Samēlia ko ʻení ʻa e tangatá.
Naʻe tokoni ʻa e Samēliá ki he tangatá ʻaki hono lilingi ʻa e loló mo e uainé ki he ngaahi matakafo ʻo e tangatá. Naʻá ne fakaheka ʻa e tangatá ki heʻene ʻasí.
Pea naʻe ʻomi leva ʻe he Samēliá ʻa e tangatá ki ha fale talifononga, ʻa ia te ne lava ʻo mālōlō mo fakaakeake ai ke toe sai ange. Kimuʻa pea mavahe ʻa e Samēliá ʻi he ʻaho hono hokó, naʻá ne ʻoange ki he tangata tauhi he fale talifonongá ha paʻanga peá ne pehē ange, “Ke ke tauhi ia.” Naʻe talaange ʻe he Samēliá te ne toe foki mai ʻi ha ngaahi ʻaho siʻi mo ha paʻanga lahi ange.
ʻI he fakaʻosinga ʻo e talanoá, naʻe fai ʻe Sīsū ha fehuʻi ki he loeá. Ko hai nai e kaungāʻapi ʻo e tangata kafó? Ko e taulaʻeikí, ko e Līvaité, pe ko e Samēliá? Naʻe pehē ʻe he loeá ko e tokotaha ko ia naʻá ne fakahaaʻi ʻa e ʻofá ki he tangatá—ʻa ia ko e Samēliá. Naʻe tala ʻe Sīsū ki he loeá ke ʻalu pea fai ʻo hangē ko e Samēliá.