Fānau ʻo e Māmá
Ko e tui kia Sīsū Kalaisi lolotonga ʻetau tatali kiate Ia ke Ne toe hāʻele maí
Naʻe fiefia ʻa e Kāingalotu ʻi he kuonga ʻo Paulá ʻi he ʻaho ʻe toe hāʻele mai ai ʻa Sīsū Kalaisi ki he māmaní. Naʻe fakaʻau ke faingataʻa e moʻuí ki he Kāingalotú ʻi ha feituʻu naʻe ui ko Tesalonika. Naʻa nau fifili pe ʻoku ʻuhinga nai ʻeni ʻe vavé ni pē ha hāʻele mai ʻa Sīsū. Naʻe faitohi ʻa Paula ke tokoniʻi kinautolu.
1 Tesalonika 4:16–18; 5:1–2; 2 Tesalonika 1:4
Naʻe pehē ʻe Paula ʻoku ʻikai ʻilo ʻe ha taha ʻa e taimi ʻe toe hāʻele mai ai ʻa Sīsuú. ʻE fakaʻohovale ia ki ha kakai ʻe niʻihi, hangē ko ha kaihaʻa ʻoku haʻu ʻi he poʻulí lolotonga ʻenau mohé.
1 Tesalonika 5:2–3; 2 Tesalonika 2:2
Ka naʻe talaange ʻe Paula ki he Kāingalotú naʻe ʻikai ke nau ʻi he fakapoʻulí. Koeʻuhi ko ʻenau muimui ʻia Sīsū Kalaisí, naʻe hoko ʻa e Kāingalotú ko ha fānau ʻo e māmá!
Naʻe fakamatalaʻi ʻe Paula, ʻe tafoki ha kakai tokolahi mei he moʻoní kimuʻa pea toe hāʻele mai ʻa Sīsuú. Naʻá ne fiemaʻu ʻa e Kāingalotú, ʻa e fānau ʻo e māmá, ke hokohoko atu ʻenau muimui kia Sīsuú mo hanganaki atu ki Heʻene hāʻele maí. Kapau te tau fai ʻeni, tatau ai pē pe ko e hā ʻoku hoko ʻi he māmaní, te tau mateuteu ʻi he taimi ʻe toe hāʻele mai ai ʻa Sīsuú.