Ko Hono Fakamolemoleʻi ʻe Sīsū ha Fefine
“ʻOku lahi ai ʻene ʻofá”
Naʻe fakaafeʻi ʻe ha tangata ko Saimone ʻa Sīsū ke haʻu ki hono falé ʻo maʻu meʻatokoni mo ia. Naʻe kau ʻa Saimone ʻi ha kau taki naʻe ui ko e kau Fālesí.
Lolotonga ʻena maʻu meʻatokoní, naʻe haʻu ha fefine ki he fale ʻo Saimoné. Naʻá ne fanongo naʻe ʻi ai ʻa Sīsū. Naʻá ne fie fakahaaʻi ʻene houngaʻia mo e ʻofa kiate Iá.
Naʻe tangi ʻa e fefiné ʻi heʻene mamata kia Sīsuú. Naʻe fufulu Hono vaʻé ʻaki hono loʻimatá. Naʻá ne holomātuʻu Hono vaʻé ʻaki hono louʻulú. Naʻá ne ʻuma ki Hono vaʻé pea tākai ʻaki ha lolo namu kakala.
Naʻe ʻiloʻi ʻe Saimone naʻe fakahoko ʻe he fefiné ni ha ngaahi angahala lahi. Naʻá ne fakakaukau kapau ko Sīsū ko ha tangata moʻoni ʻa e ʻOtuá, te Ne ʻafioʻi ko e fefiné ni ko ha angahala, pea he ʻikai ke Ne tuku ke ala kiate Ia.
Naʻe ʻafioʻi ʻe Sīsū ʻa e fakakaukau ʻa Saimoné. Naʻá Ne fakahā kia Saimone kuo fufulu ʻe he fefiné Hono vaʻé koeʻuhí naʻá ne ʻofa ʻiate Ia. Ko e angamahení, naʻe ʻoange ki he kau fakaafé ha vai ke fufulu honau vaʻé. Naʻe teʻeki fai ʻe Saimone ha meʻa pehē ke fakahaaʻi ʻaki ʻene ʻofa kia Sīsuú.
Naʻe folofola ʻa Sīsū ki he fefiné kuo fakamolemoleʻi ʻene ngaahi angahalá koeʻuhí he naʻá ne ʻofa mo tui kiate Ia. Naʻá Ne talaange te ne lava ʻo ʻalu ʻi he fiemālie.