Ko Sīsū ʻa e Tauhi Sipi Leleí
“ʻOku fanongo ʻeku fanga sipí ki hoku leʻó, pea ʻoku ou ʻiloʻi ʻa kinautolu”
Naʻe fakahā ʻe Sīsū ki he kakai ʻi Selusalemá ʻokú Ne hangē ha tauhisipi leleí. ʻOku hangē ʻEne kau ākongá, pe kau muimuí, ko ʻEne fanga sipí. ʻOku ʻofaʻi ʻe he tauhi sipi leleí ʻene fanga sipí. ʻOkú ne ʻiloʻi e hingoa ʻo e tokotaha takitaha.
Sione 10:3, 14; vakai foki, Hilamani 15:13
ʻOku ʻilo ʻe he sipí ʻa e leʻo ʻo e tauhi sipi leleí. ʻI heʻene ui kinautolú, ʻoku nau fanongo mo talangofua.
ʻOku tokangaʻi ʻe he tauhi sipi leleí ʻa ʻene fanga sipí. ʻOkú ne tataki kinautolu ki he ngaahi feituʻu maʻuiʻuí, hangē pē ko hono tataki kitautolu ʻe Sīsū Kalaisi ki he moʻui taʻengatá.
Ko e taimi ʻoku totongiʻi mai ai ha taha kehe ke ne tokangaʻi e fanga sipí, ʻoku ʻikai ke nau muimui ʻiate ia, he ʻoku ʻikai ke nau ʻiloʻi hono leʻó. ʻI he hoko mai e fakatuʻutāmakí, ʻoku hola e tokotaha ngāue totongí. ʻOku ʻikai ke ne tokanga ia ki he fanga sipí ʻo hangē ko ia ʻoku fai ʻe he tauhi sipi leleí.
ʻOku ʻikai hola ʻa e tauhi sipi leleí ʻi he hoko ha fakatuʻutāmakí. ʻOkú ne nofo ke maluʻi ʻEne fanga sipí. ʻOkú Ne loto fiemālie foki ke foaki ʻene moʻuí maʻanautolu, ʻo hangē pē ko hono foaki ʻe Sīsū Kalaisi ʻEne moʻuí maʻatautolu koeʻuhí ke tau lava ʻo maʻu ʻa e moʻui taʻengatá.
Naʻe fakahā ʻe Sīsū ki he kakai ʻi Selusalemá ʻoku ʻi ai foki mo ʻEne fanga sipi kehe ʻoku nofo ʻi ha ngaahi feituʻu kehe. Naʻe folofola ʻa Sīsū te Ne ʻaʻahi foki kiate kinautolu, pea te nau fanongo ki Heʻene ngaahi akonakí. ʻOku fakamatala ʻe he Tohi ʻa Molomoná fekauʻaki mo e ʻaʻahi ʻa Sīsū ki ha niʻihi ʻo ʻEne fanga sipi kehe ʻi he Ongo ʻAmeliká.