Ko Hono Fakamoʻui ʻe Sīsū e Tamaioʻeiki ʻa e ʻEikitaú
ʻOku fakahaaʻi ʻe ha taki Loma ha tui lahi
Naʻe nofo ha ʻeikitau ʻi Kāpaneume, ko ha kolo naʻe faʻa akonaki ai ʻa Sīsū. Ko e taki ia ʻo ha kau sōtia tokolahi.
Naʻe ʻi ai ha tamaioʻeiki ʻa e ʻeikitaú ni naʻe makehe ʻaupito kiate ia. Naʻe puke ʻa e tamaioʻeikí pea mei mate.
Neongo naʻe ʻikai ko ha Siu ʻa e ʻeikitaú, ka naʻá ne fanongo ʻia Sīsū. Naʻá ne tui naʻe maʻu ʻe Sīsū ʻa e mālohi ke fakahoko ha ngaahi mana maʻongoʻonga. Naʻá ne fekauʻi mai ha kau taki ʻe niʻihi ʻo e kau Siú ke kole kia Sīsū ke hāʻele mai ʻo fakamoʻui ʻene tamaioʻeikí.
Naʻe fakahā ʻe he kau takí kia Sīsū fekauʻaki mo e ʻeikitaú mo ʻene tamaioʻeikí. Naʻa nau pehē naʻe angaʻofa ʻa e ʻeikitaú ni ki he kau Siú. Naʻe kamata hāʻele atu ʻa Sīsū ki he fale ʻo e ʻeikitaú. Ka kimuʻa peá Ne aʻu ki aí, naʻe taʻofi ʻa Sīsū ʻe ha niʻihi ʻo e ngaahi kaungāmeʻa ʻo e ʻeikitaú. Naʻa nau tala kiate Ia ke ʻoua naʻá Ne hāʻele mai ki fale.
Naʻe pehē ʻe he ngaahi kaungāmeʻá naʻe ʻikai ongoʻi ʻe he ʻeikitaú ʻokú ne taau ke maʻu ʻa Sīsū ʻi hono falé. Naʻá ne tui ʻe lava ʻe Sīsū ʻo fakamoʻui ʻene tamaioʻeikí mei he mamaʻó!
Naʻe ofo ʻa Sīsū ʻi he tui ʻa e ʻeikitaú. Naʻá Ne folofola kuo teʻeki ai ke Ne mamata ki ha fuʻu tui lahi pehē.
ʻI he foki mai ʻa e ngaahi kaungāmeʻa ʻo e ʻeikitaú ki hono ʻapí, naʻe fakamoʻui fakaʻaufuli ʻa e tamaioʻeikí. Naʻe fakamoʻui ia ʻe Sīsū, ʻo hangē pē ko e tui ʻa e ʻeikitaú te Ne lavá.