Ko e Fanauʻi ʻo Sione Papitaisó
ʻOku tauhi ʻe he ʻOtuá ha talaʻofa kia ʻIlisapeti mo Sakalia
Ko ha ongo meʻa faivelenga ʻa Sakalia mo ʻIlisapeti ʻa ia naʻá na ʻofa ki he ʻOtuá. Naʻá na lotu ke maʻu ha pēpē. Kuó na toulekeleka ʻaupito he taimí ni, ka ʻoku teʻeki ai pē haʻana fānau.
Ko ha taulaʻeiki ʻa Sakalia naʻe ngāue ʻi he temipale ʻi Selusalemá. ʻI ha ʻaho ʻe taha, naʻe fili ai ia ke tutu ha meʻa namu kakala ʻi ha loki toputapu ʻi he temipalé.
Fakafokifā, kuo hā ange ha ʻāngelo. Naʻe ilifia ʻa Sakalia. Naʻe pehē ʻe he ʻāngeló, “Sakalia, ʻoua te ke manavahē: he kuo tau hoʻo lotú.” Naʻá ne pehē ʻe maʻu ʻe Sakalia mo ʻIlisapeti ha foha. ʻOku totonu ke na fakahingoa ia ko Sione. Naʻe pehē ʻe he ʻāngeló ʻoku ʻi ai ha ngāue mahuʻinga ke fai ʻe Sione. Te ne tokoniʻi ʻa e kakaí ke nau mateuteu ke tali ʻa e Fakamoʻuí ʻi Heʻene hāʻele maí.
Naʻe ʻikai faʻa tui ʻa Sakalia ki he meʻa naʻe lea ʻaki ʻe he ʻāngeló. Naʻá ne fuʻu motuʻa mo ʻIlisapeti ke maʻu ha fānau. Naʻe pehē ʻe he ʻāngeló koeʻuhí naʻe ʻikai tui ʻa Sakalia ki heʻene pōpoakí, he ʻikai ke ne lava ʻo lea kae ʻoua kuo fanauʻi ʻa Sione.
Naʻe fifili ʻa e kakaí pe ko e hā naʻe nofo fuoloa pehē ai ʻa Sakalia ʻi loto ʻi he temipalé. ʻI heʻene mavahé, naʻe ʻikai ke ne lava ʻo lea. Naʻa nau lava ʻo tala naʻe hoko ha meʻa makehe ai.
Hili ha ngaahi māhina mei ai, naʻe fāʻeleʻi ʻe ʻIlisapeti ha pēpē, ʻo hangē pē ko e palōmesi ʻa e ʻāngeló. Naʻe fiefia ʻaupito honau fāmilí mo e kaungāmeʻá! Naʻa nau omi ke feʻiloaki mo e pēpeé.
Naʻá na fakakaukau ʻoku totonu ke fakahingoa ʻa e pēpeé ko Sakalia, ʻo hangē ko ʻene tamaí. Naʻe pehē ʻe ʻIlisapeti, “Ui ia ko [Sione].” Naʻa nau fehuʻi kia Sakalia, ʻa ia naʻe teʻeki ai pē ke lava ʻo lea. Naʻá ne tohi ʻo pehē, “Ko [Sione] hono hingoá.” Naʻe ʻohovale ʻa e tokotaha kotoa.
Fakaʻohovale pē kuo toe lava ʻa Sakalia ʻo lea. Naʻá ne fakamālō ki he ʻOtuá pea naʻe fakafonu ʻaki ia ʻa e Laumālie Māʻoniʻoní. Naʻá ne fakahā ki he tokotaha kotoa naʻe manatuʻi ʻe he ʻOtuá ʻEne ngaahi talaʻofa ki Hono kakaí. Naʻá ne pehē ʻe hoko ʻa Sione ko ha palōfita. ʻE akoʻi ʻe Sione ʻa e kakaí ke nau fakatomala pea papitaiso. Te ne tokoniʻi kinautolu ke nau teuteu ke ako meia Sīsū Kalaisi.