ʻAʻahi ʻa e Kau ʻĀngeló kia Mele mo Siosefa
Kuo Fili ke tauhi e ʻAlo ʻo e ʻOtuá
Naʻe nofo ha fefine ko Mele ʻi he kolo ko Nāsaletí. Naʻá ne ʻofa ki he ʻOtuá mo talangofua ki Heʻene ngaahi fekaú. Naʻe ʻamanaki ke mali ʻa Mele mo ha tangata ko Siosefa, ʻa ia naʻá ne ʻofa foki ki he ʻOtuá.
ʻI ha ʻaho ʻe taha, naʻe ʻaʻahi ai ha ʻāngelo ko Kepaleli kia Mele. ʻI he kamatá, naʻe ilifia ʻa Mele. Ka naʻe pehē ʻe Kepaleli naʻe fekauʻi mai ia mei he ʻOtuá. Naʻe ʻikai fiemaʻu ke ilifia ʻa Mele. Naʻá ne pehē naʻe makehe ʻaupito ʻa Mele ki he ʻOtuá pea ʻe vavé ni pē haʻane maʻu ha pēpē. ʻE hoko e tama ʻa Melé ko e ʻAlo ʻo e ʻOtuá, ko Sīsū.
Ka naʻe puputuʻu ʻa Mele. Naʻe teʻeki ai ke ne mali mo Siosefa. ʻE lava fēfē ke ʻi ai haʻane tama? Naʻe fakamatalaʻi ʻe Kepaleli ʻe hoko ia ʻi he mālohi ʻo e ʻOtuá. Naʻá ne talaange, “He ʻoku ʻikai ha meʻa ʻe faingataʻa ki he ʻOtuá.”
Naʻe loto-fakatōkilalo mo faivelenga ʻa Mele. Naʻá ne talaange kia Kepaleli ko e kaunanga ia ʻa e ʻEikí. Naʻá ne loto-fiemālie ke hoko ko e faʻē ʻa e ʻAlo ʻo e ʻOtuá.
ʻI he ʻilo ʻe Siosefa ʻe maʻu ʻe Mele ha pēpeé, naʻá ne hohaʻa. Naʻá ne fifili pe ʻoku totonu nai ke kei mali mo Mele.
Ka ʻi ha pō ʻe taha ʻi ha misi, naʻe ʻaʻahi mai ʻa e ʻāngeló kia Siosefa. Naʻe fakahā ʻe he ʻāngeló kia Siosefa ko e tamasiʻi ʻa Melé ko e ʻAlo ia ʻo e ʻOtuá pea ʻoku totonu ke fakahingoa Ia ʻe Siosefa ko Sīsū. ʻE fakahaofi ʻe Sīsū ʻa e kakai kotoa mei heʻenau ngaahi angahalá. Naʻe pehē ʻe he ʻāngeló ʻoku totonu ke kei mali pē ʻa Siosefa mo Mele.
Naʻe fai fakatatau ʻa Siosefa ki he lea ʻa e ʻāngeló. Naʻe mali ʻa Siosefa mo Mele.
Naʻe ʻalu ʻa Mele ʻo ʻaʻahi ki hono kāinga ko ʻIlisapetí. Naʻe talaange ʻe he ʻāngeló kia Mele ʻoku feitama foki mo ʻIlisapeti, neongo naʻá ne fuʻu motuʻa. Ko ha toe mana ʻeni ʻe taha mei he ʻOtuá. ʻE tupu hake hono fohá ʻo hoko ko Sione Papitaiso. ʻI he hū atu ʻa Mele ki falé, naʻá ne fakafeʻiloaki kia ʻIlisapeti.
ʻI he fanongo pē ʻa ʻIlisapeti kia Melé, naʻe hopohopo fiefia ʻi loto ʻa e pēpē ʻa ʻIlisapetí. Naʻe fakafonu ʻa ʻIlisapeti ʻe he Laumālie Māʻoniʻoní. Naʻá ne ʻiloʻi naʻe feitamaʻi ʻe Mele ʻa e ʻAlo ʻo e ʻOtuá. Naʻe fiefia ʻa Mele mo ʻIlisapeti. Naʻá ne fakahīkihikiʻi ʻa e ʻOtuá ʻi he ngaahi meʻa fakaʻofoʻofa kotoa pē ʻokú Ne fai ke tāpuekina ʻaki ʻEne fānaú.