ʻŪ Tohi kia Tīmoté

Ko Tīmoté ko ha talavou naʻe tui mālohi kia Sīsū Kalaisi. Ko ʻene faʻē ko ʻIunisí, mo ʻene kui fefine ko Loisí, ko ha ongo fafine tui lahi foki. Naʻá na akoʻi ʻa Tīmote mei he folofolá, neongo ʻene kei siʻí.

2 Tīmote 1:5; 3:15

Naʻe kaungāmeʻa lelei ʻa Tīmote mo Paula. Kuó na ngāue mo fononga fakataha, ngāue maʻá e ʻEikí mo vahevahe ʻEne ongoongoleleí. Naʻe ʻofa ʻa Paula ʻia Tīmote ʻo hangē hano fohá.

Filipai 2:19–22; 1 Tīmote 1:2

Naʻe kole ʻe Paula kia Tīmote ke ne tataki ʻa e Siasí ʻi ʻEfesō. Naʻe pau ke ʻalu ʻa Paula ki ha kolo ʻe taha. Lolotonga ʻene mavahé, naʻá ne fai ha tohi kia Tīmote ke tokoni kiate ia.

1 Tīmote 1:1–3

Kimui ange aí, ʻi he taimi naʻe ʻi he fale fakapōpulá ai ʻa Paula ʻi Lomá, naʻá ne fai ha tohi ʻe taha kia Tīmote. Naʻá ne fakatokanga kia Tīmote ʻe hoko mai ha ngaahi taimi faingataʻa. ʻE tafoki ha kakai ʻe niʻihi mei he moʻoní pea ʻofa ʻi he ngaahi meʻa ʻo e māmaní ʻo lahi ange ʻi he ʻOtuá. Te nau akoʻi ha ngaahi meʻa ʻoku ʻikai moʻoni.

2 Tīmote 3:1–7; 4:3–4

Naʻe talaange ʻe Paula kia Tīmote ke ʻoua ʻe manavahē. Naʻá ne talaange, “He naʻe ʻikai foaki ʻe he ʻOtuá kiate kitautolu ʻa e laumālie ʻo e manavasiʻi; ka ko e mālohi, mo e ʻofa.” Naʻe talaange ʻe Paula kia Tīmote ke hokohoko atu hono fai ʻo e ngaahi meʻa kuó ne akó. ʻE tataki ia ʻe he folofolá kia Sīsū Kalaisi.

2 Tīmote 1:7–9; 3:14–17

Naʻe ʻiloʻi ʻe Paula ʻe vavé ni pē ha ʻosi ʻene moʻuí. Ka naʻe ʻikai ke ne ilifia ke mate. Naʻe talaange ʻe Paula kia Tīmote neongo naʻá ne foua ha ngaahi faingataʻa lahi ʻi heʻene moʻuí, ka kuó ne tauhi maʻu ʻene tuí ke mālohi. Naʻá ne falala ʻe foaki ange ʻe he Tamai Hēvaní mo Sīsū Kalaisi kiate ia ʻa e moʻui taʻengatá.

2 Tīmote 4:6–8