Sione 21; Mātiu 28:16–20; Maʻake 16:15–19
ʻOku Kole ʻe Sīsū ki he Kau ʻAposetoló ke Fafanga ʻEne Fanga Sipí
Ko hono fakahaaʻi ʻo e ʻofa kia Sīsuú ʻaki hono akoʻi e niʻihi kehé fekauʻaki mo Iá
Hili e toetuʻu ʻa Sīsūú, naʻe ō ʻa Pita mo ha niʻihi ʻo e Kau ʻAposetolo kehé ʻo toutai. Neongo naʻa nau toutai he poó kakato, ka naʻe ʻikai ke nau maʻu ha meʻa.
ʻI he pongipongi hono hokó, naʻe mamata ʻa e Kau ʻAposetoló kia Sīsū ʻi he matātahí, ka naʻe ʻikai ke nau ʻiloʻi ko Ia ia. Naʻá Ne fehuʻi ange pe kuo maʻu haʻanau ika. Naʻa nau talaange kuo teʻeki ai.
Naʻe folofola ange ʻa Sīsū ki he Kau ʻAposetoló ke lī honau kupengá ki he tafaʻaki toʻomataʻu ʻo e vaká pea te nau maʻu ha ika. Naʻe fai ʻe he Kau ʻAposetoló ʻa e meʻa naʻe folofola ʻaki ʻe Sīsuú, pea naʻe fakafonu ʻa e kupengá ʻaki ha ika ʻe teau tupu! Naʻe fuʻu mamafa ʻa e kupengá ʻi he iká pea ʻikai lava ʻa e Kau ʻAposetoló ʻo fusi ia ki he loto vaká.
Pea naʻe fakatokangaʻi leva ʻe Sione ko hai ʻa e tangatá. Naʻá ne talaange kia Pita, “Ko e ʻEikí ia.” Naʻe puna ʻa Pita ki he loto tahí ʻo kakau atu kia Sīsū. Naʻe ʻomi ʻe he Kau ʻAposetolo kehé ʻa e vaká mo e iká ki he matātahí. Naʻe ngaohi ʻe Sīsū ha mā mo ha ika, peá Ne fakaafeʻi ʻa e Kau ʻAposetoló ke nau kai fakataha mo Ia.
Hili ʻenau kaí, naʻe fehuʻi ange ʻe Sīsū kia Pita, “ʻOku lahi hake hoʻo ʻofa kiate aú ʻiate kinautolú ni?” Naʻe talaange ʻe Pita ʻio. Pea folofola ange leva ʻa Sīsū, “Fafanga ʻeku fanga lamí.”
Pea toe fehuʻi ange ʻe Sīsū kia Pita pe ʻokú ne ʻofa ʻiate Ia. Naʻe toe talaange ʻe Pita ʻio. Naʻe folofola ange ʻa Sīsū kiate ia, “Fafanga ʻeku fanga sipí.”
Naʻe fehuʻi ange ʻe Sīsū kia Pita ko hono tuʻo tolú pe ʻokú ne ʻofa ʻiate Ia. Naʻe talaange ʻe Pita, “ʻEiki, ʻokú ke ʻiloʻi ʻa e meʻa kotoa pē; ʻokú ke ʻiloʻi ʻoku ou ʻofa kiate koe.” Naʻe toe folofola ange ʻa Sīsū, “Fafanga ʻeku fanga sipí.” Naʻá Ne fiemaʻu ke tokangaʻi ʻe Pita ʻa e kakai ʻoku nau muimui kia Sīsuú.
Kimui ange aí, naʻe kole ʻe Sīsū ki Heʻene Kau ʻAposetoló ke nau fakataha mo Ia ʻi ha moʻunga. Naʻá Ne folofola ange ai kiate kinautolu ke nau vahevahe ʻEne ongoongoleleí ki he māmaní kotoa, akoʻi ʻEne ngaahi fekaú ki he kakaí, pea papitaiso e taha kotoa pē naʻe tuí. Naʻá Ne folofola ange, “Ko ʻeku kau fakamoʻoni ʻa kimoutolu.” Naʻá Ne talaʻofa ange te Ne ʻiate kinautolu mo foaki ange kiate kinautolu ʻa e mālohí ʻo fakafou ʻi he Laumālie Māʻoniʻoní.
Mātiu 28:16–20; Maʻake 16:15–19; Ngāue 1:8
Pea toki hāʻele hake ʻa Sīsū ki he langí ʻi ha konga ʻao. Naʻá Ne liuaki ki Heʻene Tamai ʻi Hēvaní. ʻI he mamata ʻa e Kau ʻAposetoló ki Heʻene mavahé, naʻe hā mai ha ongo ʻāngelo ʻe toko ua. Naʻá na talaange hangē pē ko e hāʻele hake ʻa Sīsū ki he langí, te Ne toe liuaki mai ki māmani ʻi he founga tatau ʻi ha ʻaho.