ʻOku Fakafehoanaki ʻe Paula Hotau Sinó ki he Temipalé
Ngaahi meʻafoaki toputapu mei he ʻOtuá
Ko Kolinitoó ko ha kolo ia ʻi he veʻe tahí. Naʻe tokolahi ʻa e kakai ʻi he koló naʻe ʻikai ke nau hū ki he ʻOtuá. Naʻe akoʻi ʻe Paula ʻa e kakai ʻi Kolinitoó fekauʻaki mo Sīsū. Naʻe tui ha kakai tokolahi pea naʻa nau papitaiso.
Hili ʻa e mavahe ʻa Paulá, naʻá ne fanongo ʻoku ʻi ai ha ngaahi palopalema ʻa e kāingalotu ʻo e Siasí. Naʻe tokolahi ha kakai ʻi Kolinitō naʻe ʻikai ke nau muimui ki he ngaahi fekau ʻa e ʻOtuá fekauʻaki mo e founga ke tauhi pe fakaʻaongaʻi ai hotau sinó.
Naʻe fai ʻe Paula ha tohi kiate kinautolu. Naʻá ne pehē, ko hotau sinó ʻoku hangē ko e temipale ʻo e ʻOtuá. ʻOku tau fakaʻapaʻapaʻi ʻa e temipalé he ko e fale ia ʻo e ʻOtuá. ʻOku totonu foki ke tau fakaʻapaʻapaʻi hotau sinó koeʻuhí he ko ha meʻaʻofa ia mei he ʻOtuá.
ʻOku finangalo ʻa e Tamai Hēvaní ke tau fili ke fai ha ngaahi meʻa lelei ʻaki hotau sinó. ʻI heʻetau fai peheé, ʻe lava ke nofoʻia ʻa e Laumālie Māʻoniʻoní ʻiate kitautolu.
Naʻe pehē ʻe Paula naʻe totongi ʻe Sīsū Kalaisi hotau moʻuá maʻatautolu ʻo fakafou ʻi Heʻene mamahí. ʻOku tau fakahaaʻi ʻetau ʻofa kia Sīsuú ʻaki ʻetau fai ha ngaahi fili lelei fekauʻaki mo hotau sinó mo tauhi ʻEne ngaahi fekaú. ʻOku tau fakahaaʻi ki he ʻOtuá ʻoku tau houngaʻia ʻi he meʻaʻofa fakaʻofoʻofa ʻo hotau sinó ʻaki ʻetau tauhi ia ke hangē ha temipalé.