ʻE Moʻui Kotoa Pē ʻia Kalaisi

Naʻe ʻi ai ha kāingalotu ʻe niʻihi ʻo e Siasí ʻi ha kolo naʻe ui ko Kolinitō naʻe ʻi ai haʻanau ngaahi fehuʻi fekauʻaki mo e meʻa ʻoku hoko hili ʻetau maté. Naʻe ʻikai ke nau fakapapauʻi pe kuo toetuʻu moʻoni ʻa Sīsū. Naʻe pehē ʻe ha kakai ʻe niʻihi naʻe ʻikai ha toetuʻu. Naʻe fanongo ʻa Paula ki he meʻá ni peá ne fai ha tohi ki he Kāingalotu ʻi Kolinitoó.

1 Kolinitō 15:12–14

Naʻe tohi ʻe Paula ko e Toetuʻu ʻa Sīsū Kalaisí ko ha konga mahuʻinga ia ʻo ʻEne ongoongoleleí. Naʻe pehē ʻe Paula, “Ko e pekia ʻa Kalaisi ʻi heʻetau ngaahi angahalá, … pea naʻe toetuʻu hake ia ʻi hono tolu ʻo e ʻahó.” Naʻe laka hake ʻi he kakai ʻe toko 500 kuo nau mamata kiate Ia hili ʻEne Toetuʻú, kau ai ʻa Paula mo ha kau ʻAposetolo kehé.

1 Kolinitō 15:1–8

Naʻe akoʻi ʻe Paula, kapau naʻe ʻikai toetuʻu ʻa Kalaisi, te tau loto-mamahi kotoa pē pea ʻikai ha ʻamanaki lelei. Koeʻuhí ko e Hinga ʻa ʻĀtamá, te tau mate kotoa, ka koeʻuhí ko Sīsū Kalaisi, te tau toetuʻu kotoa foki!

1 Kolinitō 15:17–22

Naʻe fakamanatu ʻe Paula ki he Kāingalotu ʻi Kolinitoó, naʻe papitaiso ʻa e kakaí maʻá e kau pekiá. Ko e hā ʻe fiemaʻu ai ke tau fai ia kapau he ʻikai toe tuʻu ʻa e kakai kuo pekiá? ʻOku tau papitaiso maʻá e pekiá he ʻoku tau ʻilo te nau toe moʻui. ʻOku ʻoange ai heni ʻa e faingamālie kiate kinautolu ke nau maʻu ʻa e ngaahi tāpuaki ʻa e ʻEikí.

1 Kolinitō 15:29

Naʻe fifili ha Kāingalotu ʻe niʻihi ʻi Kolinitō pe ʻe fēfē hotau sinó ʻi he taimi te tau toetuʻu aí. Naʻe pehē ʻe Paula ʻe nāunauʻia hotau sinó. He ʻikai ke nau vaivai pe puke pe fakaʻau ʻo motuʻa. ʻE maʻu ʻe ha kakai ʻe niʻihi ha sino fakasilesitiale, ʻo ngingila hangē ko e laʻaá. ʻE ngingila ha niʻihi ʻo hangē ko e māhiná, pea ngingila ha niʻihi ʻo hangē ko e ngaahi fetuʻú.

1 Kolinitō 15:35, 40–43; Tokāteline mo e Ngaahi Fuakavá 76:96–98; 88:20–23