ʻOku Fakatauʻatāinaʻi ʻe ha ʻĀngelo ʻa Pita mei he Fale Fakapōpulá
ʻOku tali ʻe he ʻOtuá ʻa e ngaahi lotú
Naʻe ʻikai saiʻia ha tuʻi ko Hēlota ʻi he kau Kalisitiané. Naʻá ne fekau ke tamateʻi ʻa e ʻAposetolo ko Sēmisí. Naʻá ne fakahū pōpula leva ʻa Pita. Naʻá ne tuku ha kau sōtia ʻe toko 16 ke leʻohi ʻa e fale fakapōpulá.
ʻI he fanongo ʻa e kāingalotu ʻo e Siasí ki he meʻá ni, naʻa nau toutou lotu ki he Tamai Hēvaní maʻa Pita.
ʻI ha pō ʻe taha, naʻe mohe ʻa Pita. Naʻe haʻi ia ʻaki ha sēini ʻe ua ʻi he vahaʻa ʻo ha ongo sōtia.
Fakafokifā pē, naʻe ulo ha maama ʻi he fale fakapōpulá, pea hā mai ha ʻāngelo. Naʻe lea ʻa e ʻāngeló ʻo pehē, “Tuʻu ke vave,” pea naʻe homo ʻa e sēiní mei he ongo nima ʻo Pitá. Naʻe talaange ʻe he ʻāngeló kia Pita ke muimui ange ʻiate ia.
Naʻe fakakaukau ʻa Pita ko haʻane misi. Naʻá ne muimui ʻi he ʻāngeló ʻo fakalaka atu ʻi he kau leʻó. Naʻe ava ʻa e matapā ukamea ʻi he hūʻanga ki he koló ʻiate ia pē, pea naʻe hū ai ʻa Pita mo e ʻāngeló.
Naʻe mavahe ʻa e ʻāngeló, pea fakatokangaʻi ʻe Pita naʻe ʻikai ko haʻane misi. Naʻá ne ʻiloʻi kuo fekauʻi mai ʻe he ʻEikí ʻa e ʻāngeló ke fakahaofi ia.
Naʻe ʻalu ʻa Pita ki he ʻapi ʻo ha fefine ko Mele, ʻa ia naʻe haʻu ki ai ha kāingalotu tokolahi ʻo e Siasí ke lotu. Naʻá ne tukituki ʻi he matapaá.
Naʻe haʻu ha kiʻi taʻahine ko Lota ki he matapaá. ʻI heʻene fanongo ki he leʻo ʻo Pitá, naʻá ne fuʻu fiefia ʻaupito! Naʻá ne lele ke tala ki he niʻihi kehé.
ʻI he taimi naʻe talaange ai ʻe Lota ki he tokotaha kotoa pē ʻoku ʻi he matapaá ʻa Pitá, naʻe ʻikai ke nau tui ki ai. Naʻe kei tukituki pē ʻa Pita.
Naʻe faifai pea nau fakaava ʻa e matapaá ʻo ʻilo ʻoku moʻoni. Kuo hao ʻa Pita! Kuo tali ʻe he ʻEikí ʻenau lotú. Naʻe fakahā ʻe Pita ki he tokotaha kotoa pē ʻa e founga naʻe ʻomi ai ia ʻe he ʻEikí mei he fale fakapōpulá.