ʻOku Fakafehoanaki ʻe Paula ʻa e Siasí ki he Sino ʻo Kalaisí

Ko Kolinitoó ko ha kolo lahi mo moʻumoʻua. Naʻe nofo ai ha kāingalotu tokolahi ʻo e Siasi ʻo Sīsū Kalaisí. Ka naʻa nau omi mei ha ngaahi feituʻu kehekehe pea naʻa nau kehekehe pē ʻiate kinautolu. Naʻe loto ʻa Paula ke tokoniʻi kinautolu ke nau uouangataha mo sio ki he lelei ʻiate kinautolú. Ko ia naʻá ne fai ha tohi kiate kinautolu.

1 Kolinitō 1:11–13

ʻI he tohi ʻa Paulá, naʻá ne talaange ki he Kāingalotú ʻoku nau maʻu ha meʻafoaki kotoa mei he ʻOtuá. Naʻe maʻu ʻe ha kakai ʻe niʻihi ʻa e meʻafoaki ʻo e tuí. Ko e niʻihi naʻa nau maʻu ʻa e meʻafoaki ʻo e fakahoko ha ngaahi maná. Ko e niʻihi naʻa nau poto, pea ko e niʻihi naʻa nau lava ʻo fakamoʻui ʻa e niʻihi kehé. Naʻe lava ʻe ha kakai ʻe niʻihi ʻo lea ʻi ha ngaahi lea fakafonua kehe. Naʻe maʻu ʻe he Kāingalotú kotoa ha ngaahi meʻafoaki kehekehe, ka naʻe ʻomi kotoa kinautolu mei he ʻOtuá.

1 Kolinitō 12:3–11, 29–30

Naʻe akoʻi ʻe Paula, neongo naʻe kehe ʻa e Kāingalotú ʻiate kinautolu, ka naʻe fakatahatahaʻi kinautolu ʻe heʻenau tui kia Sīsuú. ʻI heʻenau fili ke muimui ki he ngaahi akonaki ʻa Sīsuú, papitaiso, mo kau ki Hono Siasí, naʻa nau hoko ai ko ha kulupu pē ʻe taha, ʻo nau uouangataha ʻia Sīsū Kalaisi.

1 Kolinitō 12:27

Naʻe pehē ʻe Paula, ʻoku hangē ʻa e Siasí ha sinó, ʻoku ʻi ai hono ʻulu, ongo nima, ongo kauvaʻe, mo e vaʻe. ʻOku fakahoko ʻe he konga takitaha ʻo e sinó ha ngaahi meʻa kehekehe. ʻOku ʻikai totonu ke ongoʻi loto-mamahi ʻa e telingá he ʻoku kehe ia mei he matá. Pea heʻikai lava ke pehē ʻe he ʻulú ki he vaʻé, “ʻOku ʻikai te ke ʻaonga kiate au.” ʻOku mahuʻinga ʻa e konga takitaha, pea ʻoku nau ngāue fakataha.

1 Kolinitō 12:12–14

Naʻe ui ʻe Paula ʻa e Kāingalotu ʻi Kolinitoó “ko e sino ʻo Kalaisi.” Naʻá ne fiemaʻu ke nau ngāue fakataha ʻo hangē ko e ngaahi konga kehekehe ʻo ha sino, ʻo ngāue ʻaki honau ngaahi meʻafoaki kehekehé ke fetokoniʻaki mo tāpuekina kinautolu.

1 Kolinitō 12:15–27

Ke fakahoko ʻení, naʻe fiemaʻu ʻe he kakaí ha faʻahinga ʻofa ʻoku makehe moʻoni, naʻe ui ko e ʻofa faka-kalaisi. Ko e ʻofa ia ʻoku maʻu ʻe Sīsū Kalaisi maʻá e tokotaha kotoa. Naʻe pehē ʻe Paula, ʻoku ʻuhinga ʻa e maʻu ʻo e ʻofa faka-kalaisí ki he kātakiʻi ʻa e niʻihi kehé, naʻa mo e taimi ʻoku nau anga taʻeʻofa aí. ʻOku ʻuhinga ia ke ʻoua ʻe anga taʻefakaʻapaʻapa, siokita, pe meheka. ʻOku ʻuhinga ia ki he manako ʻi he moʻoní mo maʻu ʻa e ʻamanaki leleí.

1 Kolinitō 13:1–7; Molonai 7:47

Naʻe talaange ʻe Paula ki he Kāingalotu ʻi Kolinitoó, ʻoku tolonga ʻo taʻengata ʻa e ʻofa faka-kalaisí. Neongo pe ko e hā ʻa e ngaahi meʻafoaki ʻoku tau maʻú, ʻoku fiemaʻu ke tau maʻu kotoa ʻa e ʻofa faka-kalaisí. ʻE lava ke maʻu ʻe hatau faʻahinga taha pē ʻa e ʻofa faka-kalaisí kapau te tau kolea ia ki he Tamai Hēvaní ʻaki hotau lotó kotoa pea tau feinga ke hoko ko ha muimui moʻoni ʻo Sīsū Kalaisi.

1 Kolinitō 13:1–3, 8; Molonai 7:48