Ko e Talanoa Fakatātā ʻo e Kau Taaupoʻou ʻe Toko Hongofulú
Ko e mateuteu ke toe hāʻele mai ʻa Sīsuú
Naʻe ʻiloʻi ʻe he kau ākonga ʻa Sīsuú ʻe ʻi ai e ʻaho, hili ʻEne hāʻele hake ki Heʻene Tamaí, ʻe toe liuaki mai ʻa Sīsū ki he māmaní. Naʻa nau fehuʻi kiate Ia pe te nau ʻiloʻi fēfē ʻa e taimi te Ne toe hāʻele mai aí. Naʻa nau fie mateuteu kiate Ia. Naʻe fai ʻe Sīsū ha talanoa fakatātā ke tali kiate kinautolu.
ʻI he talanoa fakatātaá, ʻoku ʻalu ha kau fafine ʻe toko hongofulu ki ha taʻane. Naʻe fakahoko poʻuli ʻa e taʻané, ʻa ia naʻe pau ke toʻo ʻe he kau fafiné ha ngaahi maama ʻo fakafonu ʻaki e loló ke fakamaama honau halá. Naʻe poto ha toko nima ʻo e kau fafiné ʻo nau ʻomi ha lolo lahi mo kinautolu. Naʻe vale ʻa e toko nima kehé pea ʻikai ke nau ʻomi ha lolo feʻunga.
Naʻe pau ke tatali ʻa e kau fafiné ke haʻu ʻa e tangata taʻané mo ʻene kakai ʻi he taʻané. Ka naʻe kiʻi fuoloa mai ʻa e tangata taʻané. Lolotonga ʻenau tatalí, naʻa nau tō kotoa ʻo mohe.
ʻI he tuʻuapoó, naʻe kaila mai ha taha kuo faifai pea haʻu ʻa e tangata taʻané! Kuo taimi ke kau fakataha mo ia ʻa e kau fafiné ʻi he taʻané.
Naʻe toʻo kotoa hake ʻe he kau fafiné ʻenau māmá ke fakamaama honau halá. Ka ko e kau fafine ʻe toko nima naʻe ʻikai ke nau ʻomi ha lolo feʻungá, naʻe ʻikai haʻanau maama. Naʻe ʻosi ʻenau loló lolotonga ʻenau tatali ki he tangata taʻané.
Naʻe kole ange ʻe he kau fafine ne ʻikai haʻanau loló ki he niʻihi kehé ke vahevahe ange haʻanautolú. Ka naʻe ʻikai feʻunga ʻa e loló ke vahevahe. Naʻe mavahe vave atu ʻa e kau fafine ʻe toko nima ne ʻikai haʻanau loló ke fakatau mai ke lahi.
Lolotonga ʻenau mavahé, naʻe haʻu ʻa e tangata taʻané! Naʻe ō mo ia ʻa e kau fafine ʻe toko nima naʻe mateuteú ki he taʻané.
ʻI he foki mai ʻa e kau fafine kehé, naʻe tāpuni ʻa e matapaá. Naʻa nau tukituki ʻi he matapaá mo kole ki he tangata taʻané ke fakahū atu kinautolu. Ka naʻe fuʻu tōmui ia. Naʻe ʻikai ke nau lava ʻo hū atu ki he taʻané.
ʻOku hangē ʻa Sīsū ko e tangata taʻane ʻi he talanoa fakatātaá. ʻOku ʻikai ʻiloʻi ʻe ha taha ʻa e taimi te Ne toe hāʻele mai aí. ʻOku ʻafioʻi ia ʻe he Tamai Hēvaní. Ko ia ai, naʻe folofola ange ʻa Sīsū ki Hono kau muimuí ke nau mateuteu hangē ko e kau fafine ʻe toko nima naʻe feʻunga ʻenau loló. Ko e kakai ʻoku nau talangofua ki he ngaahi fekau ʻa e ʻEikí mo muimui ki he Laumālié, te nau mateuteu ʻi he taimi ʻe toe hāʻele mai ai ʻa Sīsū Kalaisí.