Sīsū ʻi Ketisemani
Ko e mamahi maʻá e ngaahi angahala ʻo e māmaní
Naʻe hāʻele ʻa Sīsū mo ʻEne Kau ʻAposetoló ki ha ngoue naʻe ui ko Ketisemani. Naʻe kole ʻe Sīsū kia Pita, Sēmisi, mo Sione ke nau muimui ʻiate Ia pea tala ki he toengá ke nau tatali.
Naʻe folofola ange ʻe Sīsū kia Pita, Sēmisi, mo Sione naʻá Ne ongoʻi loto-mamahi ʻaupito. Naʻá Ne kole ange ke nau ʻāʻā mo Ia lolotonga ʻEne lotú.
Naʻe hāʻele ʻa Sīsū ʻo toe mamaʻo atu ki he ngoué. Naʻe kamata ke Ne mamahi koeʻuhí ko ʻetau ngaahi angahalá kae lava ke tau fakatomala pea fakamolemoleʻi kitautolu. Naʻe toe ongoʻi foki ʻe Sīsū ʻetau mamahí, mahamahakí, mo e loto-mamahi kotoa pē koeʻuhí ke Ne ʻafioʻi ʻa e founga ke tokoniʻi ai kitautolú. Naʻá Ne fakahoko ʻeni koeʻuhí ʻokú Ne ʻofa ʻiate kitautolu. Ko e konga kotoa ʻeni ʻo e palani ʻa e Tamai Hēvaní.
Mātiu 26:39; Luke 22:41; Loma 3:23; ʻAlamā 7:11–13; 3 Nīfai 27:19
Naʻe fakamamahi ʻaupito ʻa e mamahi ʻa Sīsuú naʻá Ne kole ai ki he Tamai Hēvaní pe te Ne lava ʻo toʻo atu ʻa e mamahí. Ka naʻá Ne loto-fiemālie ke fai ʻa e meʻa naʻe finangalo ʻEne Tamaí ke Ne faí. Naʻá Ne folofola, “ʻOua naʻa fai hoku lotó, ka ko e finangalo ʻoʻoú.”
Naʻe hāʻele atu ʻa Sīsū kia Pita, Sēmisi, mo Sione ʻo vakai ʻoku nau mohe. Naʻá Ne fafangu kinautolu pea toe kole ange ke nau ʻāʻā ʻo lotu. Ka naʻá Ne ʻafioʻi neongo naʻa nau fie ʻāʻā, ka naʻa nau fuʻu helaʻia ʻaupito.
Naʻe toe lotu ʻa Sīsū. Naʻe haʻu ha ʻāngelo ke ʻoange ha mālohi kiate Ia. Naʻá Ne ongoʻi ha mamahi lahi, pea naʻá Ne lotu ʻo toe lahi ange. Ko ʻene tautaʻá naʻe tulutā ia ko e toto naʻe tō ki he kelekelé.
Mātiu 26:42; Luke 22:43–44; Mōsaia 3:7; Tokāteline mo e Ngaahi Fuakava 19:16–19
Naʻe tuʻo ua ʻa e hāʻele ʻa Sīsū kia Pita, Sēmisi, mo Sione ʻo ʻiloʻi ʻoku nau mohé. Naʻe faifai peá Ne fafangu kinautolu, koeʻuhí kuo hokosia ʻa e taimi ke ʻave ai Iá.