ʻAʻeva ʻi he Fukahi Vaí
ʻOku ikunaʻi ʻe he tuí ʻa e manavaheé
Naʻe fiemaʻu ʻe Sīsū ha taimi tokotaha ke lotu ai. Naʻá Ne fekauʻi atu ʻEne kau ākongá ʻi ha vaka ki he tafaʻaki ʻe taha ʻo e Tahi Kālelí. Naʻe hāʻele atu ʻa Sīsū ke lotu ʻi ha moʻunga.
Naʻe mālohi ʻa e havilí, pea māʻolunga mo e ngaahi peaú ʻi he pō ko iá. Naʻe ngāue mālohi ʻa e kau ākonga ʻa Sīsuú ʻi he poó kakato ʻo feinga ke aʻu ʻa e vaká ki he tafaʻaki ʻe taha ʻo e tahí.
ʻI he mei ʻosi ʻa e poó, naʻe fakatokangaʻi ʻe he kau ākongá ha taha ʻoku lue mai kiate kinautolu ʻi he fukahi vaí. Naʻa nau pehē ko ha laumālie ia, pea naʻa nau ilifia. Naʻe ʻikai ko ha laumālie; ko Sīsū ia! Naʻá Ne folofola atu kiate kinautolu, “Fiemālie pē; he ko au pē; ʻoua te mou manavahē.”
Naʻe kole ʻe Pita kia Sīsū ke fakaafeʻi ia ke haʻu kiate Ia ʻi he fukahi vaí. Naʻe folofola ʻa Sīsū, “Haʻu!” Naʻe hopo ʻa Pita mei he vaká ʻo kamata lue ʻi he fukahi tahí, ʻo hangē pē ko Sīsuú!
Ka ʻi he mamata ʻa Pita ki he matangi mālohí mo e peau lalahí, naʻá ne manavahē ai. Naʻe kamata ke ne ngoto hifo ki he loto vaí. Naʻá ne ui kia Sīsū, “ʻEiki, fakamoʻui au.”
Naʻe ala atu ʻa Sīsū ʻo puke hake ʻa Pita. Naʻá ne fehuʻi kia Pita pe ko e hā naʻe veiveiua ai kae ʻikai falala lahi ange kiate Iá.
ʻI he foki ʻa Sīsū mo Pita ki he vaká, naʻe tuʻu ʻa e matangí. Naʻe ofo ʻa e kau ākongá ʻi he meʻa naʻe hokó. Naʻa nau ʻiloʻi ko Sīsū moʻoni ʻa e ʻAlo ʻo e ʻOtuá, pea naʻa nau hū kiate ia.