Sīsū, ko ha Fefine, mo ha Vaitupu
Ko e ako fekauʻaki mo e vai ʻo e moʻuí
Naʻe hāʻele atu ʻa Sīsū mo ʻEne kau ākongá ʻi Samēlia ki Kāleli. Naʻa nau tuʻu ke maʻu ha vai ʻi ha vaitupu. Lolotonga e mālōlō ai ʻa Sīsuú, naʻe ʻalu ʻEne kau ākongá ke fakatau ha meʻakai.
Naʻe haʻu ha fefine mei Samēlia ki he vaitupú ke ʻutu ʻene hina vaí. Naʻe kole ange ʻe Sīsū ha vai ke ne inu. Naʻe ofo ai ʻa e fefiné. Ko Sīsuú ko ha Siu, pea ko e tokolahi taha ʻo e kakai Siú naʻe ʻikai ke nau lea ki he kau Samēliá.
Naʻe folofola ange ʻe Sīsū kiate ia ko e kakai ʻoku nau inu vai mei he vaitupú te nau toe fieinua pē. Ka te Ne lava ʻo foaki ange ʻa e “vai moʻui” ʻo e moʻui taʻengatá, pea he ʻikai ke toe fieinua ia. Naʻe pehē ʻe he fefiné naʻá ne fiemaʻu ʻa e “vai moʻui” ko ʻení.
Naʻe talaange ʻe Sīsū ke ʻalu ʻo haʻu mo hono husepānití. Naʻá ne pehē ange, “ʻOku ʻikai haku ʻunoho.” Naʻe folofola ange ʻa Sīsū kuo ʻi ai hono husepāniti ʻe toko nima, pea ko e tangata ʻoku nofo mo iá ʻoku ʻikai ko hano husepāniti.
Naʻe ʻohovale ʻa e fefiné ʻi hono ʻafioʻi ʻe Sīsū ʻa e ngaahi meʻá ni fekauʻaki mo iá. Naʻá ne pehē naʻá ne ʻiloʻi ʻe vavé ni pē ha hāʻele mai ha Fakamoʻui. Naʻe folofola ange ʻa Sīsū ko Ia ʻa e Fakamoʻuí.
Naʻe tuku ʻe he fefiné ʻene hina vaí ʻi he vaitupú peá ne ʻalu atu ia ki he koló. Naʻá ne talaange ki he kakai tokolahi kuó ne ʻilo ʻa e Fakamoʻuí. Naʻá ne fakaafeʻi kinautolu ke nau haʻu ʻo fanongo ki Heʻene akonakí. Koeʻuhí ko e fefine ko ʻení, naʻe tui ha kau Samēlia tokolahi kia Sīsū Kalaisi.