Ko Hono Fakamoʻui ʻe Sīsū ʻa Lasalosí
“Ko au ʻa e toetuʻú, mo e moʻuí”
Naʻe nofo ʻa Mele, Māʻata, mo Lāsalosi ʻi ha kolo naʻe ui ko Pētani. Naʻa nau tui kia Sīsū, pea naʻá Ne ʻofa ʻiate kinautolu. Ko e ongo tuofefine ʻo Lāsalosí ko Mele mo Mā‘ata.
Naʻe puke lahi ʻaupito ʻa Lāsalosi. Naʻe ʻi ha kolo ʻe taha ʻa Sīsū. Naʻe ʻave ʻe Mele mo Māʻata ha pōpoaki kiate Ia ke Ne ʻiloʻi naʻe puke Hono kaungāmeʻá.
Naʻe tatali ʻa Sīsū ʻi ha ʻaho ʻe ua. Naʻá Ne fakahā leva ki Heʻene kau ākongá te nau ō ki Pētani. Naʻe hohaʻa ʻa e kau ākongá koeʻuhí he naʻe loto ha niʻihi ʻo e kakai ofi ki Pētaní ke nau fakalaveaʻi ʻa Sīsū. Ka naʻe loto ʻa Sīsū ke tokoni kia Lāsalosi. Naʻe talaange ʻe Sīsū kuo ʻosi pekia ʻa Lāsalosi, pea te Ne fakamoʻui ia.
Naʻe fetaulaki ʻa Māʻata mo Sīsū ʻi tuʻa ʻi he koló. Naʻá ne talaange kapau naʻe hāʻele mai ʻa Sīsū kimuʻa ange, naʻe ʻikai ke mate ʻa Lāsalosi ia. Naʻe palōmesi ange ʻa Sīsū ʻe toe moʻui pē ʻa Lāsalosi.
Naʻe talaange ʻe Sīsū, “Ko au ko e toetuʻu, mo e moʻui.” Naʻá Ne ʻeke kia Māʻata pe ʻokú ne tui kiate Ia. Naʻá ne pehē ange, “ʻOku ou tui ko e Kalaisí koe, ko e ʻAlo ʻo e ʻOtuá.”
Naʻe foki ʻa Māʻata ki he falé ʻo talaange kia Mele kuo hāʻele mai ʻa Sīsū. Naʻe haʻu ʻa Mele ʻo fakatōmapeʻe ʻi he vaʻe ʻo Sīsuú, ʻo tangi koeʻuhi ko hono tuongaʻané. Naʻe tutulu foki mo Sīsū. Naʻá Ne ʻofa ʻia Lāsalosi, Mele, mo Māʻata.
Naʻe ʻalu ʻa Sīsū, Māʻata, Mele, mo ha niʻihi kehe ki he ʻana naʻe tanu ai ʻa Lāsalosí. Naʻe tāpuni ʻa e hūʻangá ʻaki ha fuʻu maka lahi. Naʻe folofola ʻa Sīsū ke ʻunuki ʻa e maká.
Ka naʻe talaange ʻe Māʻata kia Sīsū kuo ʻosi ha ʻaho ʻe fā mei he mate ʻa Lāsalosí. Naʻe fakamanatu ange ʻe Sīsū kia Māʻata ʻo kau ki Heʻene talaʻofá. Naʻá Ne kole ange ke ne tui.
Pea naʻe lotu leva ʻa Sīsū ki Heʻene Tamaí. Naʻá Ne fakamālō ki he ʻOtuá ʻi heʻene fanongo maʻu pē kiate Iá. Naʻe fiemaʻu ʻe Sīsū ke tui ʻa e kakaí naʻe fekauʻi mai Ia ʻe he ʻOtuá ke hoko ko e Fakamoʻuí. Naʻe ui atu leva ʻa Sīsū, “Lāsalosi, tuʻu mai.”
Naʻe hū mai ʻa Lāsalosi ki tuʻa mei he ʻaná. Naʻe kei kofukofuʻi ʻaki pē ia e ngaahi kofu mo e ʻū tupenu naʻe telio ʻakí. Naʻe talaange ʻe Sīsū ki he kakaí ke nau vete ia. Naʻe tui ha kakai tokolahi ne nau mamata he ʻaho ko iá ko Sīsū moʻoni pē ʻa e Fakamoʻuí, ko e ʻAlo ʻo e ʻOtuá.