ʻOku Fakamoʻui ʻe Sīsū ha Tangata Naʻe ʻIkai Lava ʻo Lue
Fakamoʻui fakatuʻasino mo fakalaumālie
Naʻe fie fanongo ha kakai tokolahi ki he akonaki ʻa Sīsuú. ʻI he ʻaho ʻe taha na‘á Ne akonaki ʻi ha fale ʻoku fonu ʻi he kakaí.
Naʻe haʻu ha kakai ʻe toko fā ki he falé mo ha kaungāmeʻa naʻe ʻikai lava ʻo lue. Naʻe pau ke nau fua ia ʻi ha mohenga. Naʻa nau fie ʻomi honau kaungāmeʻá kia Sīsū, ka naʻe fuʻu tokolahi ʻa e falé, pea naʻe ʻikai ke nau lava ʻo hū ki loto.
Ko ia naʻa nau fua leva honau kaungāmeʻá ki he ʻato ʻo e falé. Naʻa nau toʻo ha konga ʻo e ʻató pea tukutukuhifo honau kaungāmeʻá mo hono mohengá ki loto ki he falé, ʻi he lotolotonga ʻo e kakaí, ʻi muʻa ʻia Sīsū.
ʻI he ʻafio ʻa Sīsū ki heʻenau tuí, naʻá Ne folofola ai ki he tangata naʻe ʻikai lava ʻo lué, “Foha, kuo fakamolemole hoʻo ngaahi angahalá.”
ʻI he fanongo ha niʻihi ʻo e kau taki ʻo e kau Siú ki he meʻá ni, naʻa nau ʻita. Naʻa nau fakakaukau ko e ʻOtuá pē te Ne lava ʻo fakamolemoleʻi ʻa e ngaahi angahalá.
Naʻe ʻafioʻi ʻe Sīsū ʻenau fakakaukaú. Naʻá Ne fakahoko ha mana, ke tokoni ke mahino kiate kinautolu naʻá Ne maʻu ʻa e mālohi ke fakamolemoleʻi ʻa e ngaahi angahalá. Naʻá ne folofola ki he tangata naʻe ʻikai lava ʻo lué, “Tuʻu hake, ʻo toʻo ho mohengá, mo [ke] ʻalu ki ho falé.” Naʻe tuʻu hake ʻa e tangatá ʻo lue! Naʻe ofo ʻa e tokotaha kotoa pea fakafetaʻi ki he ʻOtuá.