Paula mo Sailosi

Naʻe ui ʻe he ʻEikí ʻa Paula mo Sailosi ke na malangaʻi fakataha ʻa e ongoongoleleí. Naʻá na fononga ki ha ngaahi kolo lahi ke sio pe naʻe fēfē ʻa e ngaahi siasí ai.

Ngāue 15:40–41; 16:4–8

ʻI ha pō ʻe taha, naʻe sio ʻa Paula ʻi ha mata meʻa-hā-mai ki ha tangata mei Masitōnia ʻokú ne kole ange ke haʻu ki hono koló. Naʻe mavahe leva ʻa Paula mo Sailosi he taimi pē ko iá. Naʻá na ʻiloʻi naʻe finangalo ʻa e ʻOtuá ke na ō.

Ngāue 16:9–10

ʻI heʻena aʻu ki Masitōniá, naʻe fanongo ha fefine ko hono hingoá ko Lītea ki heʻena akonakí. Naʻe fakaava ʻe he ʻEikí ʻa e loto ʻo Līteá. Naʻá ne tui ki he meʻa naʻe akoʻi ʻe Paulá pea naʻe papitaiso ia.

Ngāue 16:13–15

Naʻe talaange ʻe Lītea kia Paula mo Sailosi te na lava ʻo nofo ʻi hono falé lolotonga ʻena ʻi aí.

Ngāue 16:15

Ka naʻe ʻikai saiʻia ʻa e taha kotoa ʻi he ʻi ai ʻa Paula mo Sailosí. Naʻe ʻi ai ha kakai ʻe niʻihi naʻe ʻikai ke nau saiʻia ʻi he meʻa naʻá na akoʻí. Naʻa nau ʻave ʻa Paula mo Sailosi ki he māketí pea talaange ki he kau taki ʻo e koló naʻá na fakahohaʻasi ʻa e kakaí.

Ngāue 16:16–21

Naʻe ʻita ʻa e kakaí kia Paula mo Sailosi. Naʻe haehae ʻe he kau taki ʻo e koló ʻa e vala ʻo Paula mo Sailosí pea nau pehē ʻoku totonu ke tā kinaua.

Ngāue 16:22–23

Naʻe lī leva ʻe he kau taki ʻo e koló ʻa Paula mo Sailosi ki he fale fakapōpula. Naʻa nau haʻi hona vaʻé pea fokotuʻu ha leʻo ke leʻohi kinaua.

Ngāue 16:23–24

ʻI he pō ko iá, naʻe lotu ʻa Paula mo Sailosi mo hivaʻi ha ngaahi himi ki he ʻOtuá lolotonga iá naʻe fanongo pē ʻa e kau pōpula kehé. Fakafokifā pē kuo kamata ke ngalulu ʻa e kelekelé. Naʻe fakaava ʻa e ʻū matapā ʻo e fale fakapōpulá, pea naʻe vete ʻa e ngaahi haʻí.

Ngāue 16:25–26

Naʻe ʻā hake ʻa e tangata leʻó ʻo sio ki he ava ʻa e matapaá. Naʻá ne fakakaukau kuo hola ʻa e kau pōpulá pea ʻe tauteaʻi ia ʻi heʻene tukuange ke nau holá. Naʻe talaange ʻe Paula ki he tangata leʻó ke ʻoua ʻe hohaʻa. Naʻe kei ʻi ai kotoa pē ʻa e kau pōpulá.

Ngāue 16:27–28

Naʻe ilifia ʻa e tangata leʻó. Naʻá ne tūʻulutui ʻi he tafaʻaki ʻo Paula mo Sailosí ʻo pehē, “Ko e hā te u fai ke u moʻui aí?” Naʻá na talaange, “Tui ki he ʻEiki ko Sīsū Kalaisí.”

Ngāue 16:27–31

Naʻe akoʻi ʻe Paula mo Sailosi ʻa e ongoongoleleí ki he tangata leʻó mo hono fāmilí. Naʻe tokangaʻi ʻe he tangata leʻó ʻa e ngaahi kafo ʻo Paula mo Sailosí. ʻI he pō ko iá, naʻe papitaiso ai ia mo hono fāmilí!

Ngāue 16:32–33