Ko Hono Fakamoʻui ʻe Sīsū ha Fefine ʻi he Sāpaté

Naʻe hāʻele ʻa Sīsū mo ʻEne kau ākongá ʻi ha loto ʻataʻatā ʻi he ʻaho Sāpaté. Naʻa nau fiekaia, ko ia naʻa nau paki ai ha uite ʻo kai. Naʻe fakatokangaʻi kinautolu ʻe ha kau taki ʻe niʻihi ʻo e kau Siú ko e kau Fālesí. Naʻe fokotuʻu ʻe he kau Fālesí ha ngaahi lao lahi fekauʻaki mo e ʻaho Sāpaté. Naʻe fepaki ʻa hono paki ʻo e uité mo ʻenau ngaahi laó.

Mātiu 12:1–2

Naʻe fehuʻi ʻe he kau Fālesí kia Sīsū pe ko e hā naʻe ʻikai tauhi ai ʻe Heʻene kau ākongá ʻa e Sāpaté. Naʻe tali ange ʻe Sīsū kuo teʻeki ke nau fai ha meʻa hala. Naʻe foaki mai ʻe he ʻOtuá ʻa e ʻaho Sāpaté ke tāpuekina ai kitautolu, kae ʻikai ʻai ʻetau moʻuí ke faingataʻa ange.

Mātiu 12:2–8; Maʻake 2:27

Kimui ange aí, naʻe akonaki ʻa Sīsū ʻi ha falelotu lahi ʻi he ʻaho Sāpaté. Naʻe fakatokangaʻi ʻe Sīsū ha fefine ai. Naʻe ʻikai ke ne lava ʻo tuʻu hangatonu. Naʻá ne feʻao mo e palopalemá ni ʻi ha taʻu ʻe 18.

Luke 13:10–12

Naʻe fakaafeʻi ʻe Sīsū ʻa e fefiné ke haʻu kiate Ia. Naʻá Ne hilifaki Hono ongo toʻukupú kiate ia ke tāpuakiʻi ia.

Luke 13:12–13

Naʻe tuʻu hangatonu pē ʻa e fefiné he taimi pē ko iá. Naʻe ʻita ʻa e taki ʻo e falelotu lahí koeʻuhí he naʻe fai fakamoʻui ʻa Sīsū ʻi he ʻaho Sāpaté.

Luke 13:13–14

Naʻe pehē ʻe Sīsū ko hono tokoniʻi e fefine ko ʻení ko e meʻa totonu ia ke faí. Ko e meʻa totonu ke fai lelei ʻi he ʻaho Sāpaté. Naʻe mā ʻa e takí, pea naʻe fiefia ʻa e kakai ʻi he falelotu lahí he naʻe fakamoʻui ʻa e fefiné.

Luke 13:15–17; vakai foki Luke 6:9