Sīsū mo e Talavou Koloaʻiá
“Ko e hā te u fai ke maʻu ai ʻa e moʻui taʻengatá?”
Lolotonga e fononga ʻa Sīsū mo ʻEne kau ākongá, naʻe lele mai ha talavou koloaʻia kia Sīsū ʻo tūʻulutui ʻi Hono ʻaó. Naʻá ne fehuʻi kia Sīsū pe ko e hā ʻoku totonu ke ne fai kae lava ke toe nofo fakataha mo e Tamai Hēvaní.
Naʻe fakamanatu ange ʻe he Fakamoʻuí ki he talavoú kuó ne ʻosi ʻiloʻi e ngaahi fekau ʻa e ʻOtuá: ʻoua ʻe tāmate, ʻoua ʻe loi pe kaihaʻa, pea fakaʻapaʻapa ki hoʻo tamaí mo hoʻo faʻeé.
Naʻe tali ange ʻe he talavoú kuó ne talangofua maʻu ai pē ki he ngaahi fekaú ni, talu mei heʻene kei siʻí.
Naʻe ʻafio ʻa Sīsū ki he talavoú ʻi he ʻofa. Naʻá Ne folofola ange kiate ia, naʻe fiemaʻu ke ne fai mo ha toe meʻa ʻe taha. Naʻe fiemaʻu ke ne fakatau ʻa e meʻa kotoa pē naʻá ne maʻú, foaki ʻa e paʻangá ki he masivá, pea hoko ko e taha ʻo e kau muimui ʻo Sīsuú. Te ne maʻu leva ai ha ngaahi koloa ʻi he langí!
Naʻe koloaʻia ʻaupito ʻa e talavoú. Naʻe ʻikai ke ne fie foaki ʻa e meʻa kotoa naʻá ne maʻú. Naʻá ne mavahe mo ongoʻi loto-mamahi.
Naʻe folofola ʻa Sīsū ʻoku faingofua ange ki ha kāmeli ke hū he avaʻi huí ʻi ha hū ʻa e kakai ʻoku nau ʻofa he koloá ki he puleʻanga ʻo e ʻOtuá. Naʻe ʻohovale ʻa e kau ākongá. Naʻa nau fehuʻi ange, “Pea ko hai [leva] ʻe [lava ʻo faka]moʻuí?” Naʻe fakamatalaʻi ange ʻe Sīsū kuo pau ke tau falala ki he ʻOtuá ke fakamoʻui kitautolu. Naʻá Ne folofola ange, “ʻOku faʻa fai ʻe he ʻOtuá ʻa e meʻa kotoa pē.”