ʻOku Papitaiso ʻa Sīsū
Ko hono tā ha sīpinga ʻo e talangofua ki he ʻOtuá
Naʻe ui ʻe he ʻOtuá ʻa Sione ke tokoni ki he kakaí ke nau teuteu ki he hāʻele mai ʻa Sīsū Kalaisí. Naʻe akoʻi ʻe Sione ʻa e kakaí ke nau fakatomala pea papitaiso. Naʻe ui ia ʻe he kakaí ko Sione Papitaiso.
Naʻe hoko ʻa Sione ko ha faiako maʻongoʻonga. Naʻe omi ha kakai tokolahi ke fanongo kiate ia pea papitaiso. ʻI ha ʻaho ʻe taha, naʻe haʻu ai ʻa Sīsū ke papitaiso.
Naʻe ʻiloʻi ʻe Sione naʻe talangofua maʻu pē ʻa Sīsū ki he ʻOtuá. Naʻe ʻikai fiemaʻu ia ke Ne fakatomala. Naʻe ʻikai fakakaukau ʻa Sione ʻoku totonu ke ne papitaiso ʻa Sīsū. Naʻe fakakaukau ʻa Sione ʻoku totonu ke papitaiso ia ʻe Sīsū!
Naʻe folofola ʻa Sīsū naʻe fiemaʻu foki ke Ne papitaiso. Naʻá Ne fie talangofua ki he ngaahi fekau kotoa ʻa ʻEne Tamaí. Naʻá Ne fie tā foki ha sīpinga maʻatautolu. Naʻe papitaiso Ia ʻe Sione.
Hili e ʻalu hake ʻa Sīsū mei he vaí, naʻe maliu hifo ʻa e Laumālie Māʻoniʻoní kiate Ia ʻo hangē ha lupé. Naʻe folofola mai ʻa e Tamai Hēvaní mei he langí ʻo pehē, “Ko hoku ʻAlo ʻofaʻangá ʻeni.” Naʻe hōifua ʻaupito ʻa e Tamai Hēvaní ʻia Sīsū.