Ko Hono Fakamoʻui ʻe Sīsū ha Kau Tangata Kilia ʻe Toko Hongofulu
Ko e mahuʻinga ʻo e loto-houngaʻiá
Lolotonga e fononga ʻa Sīsuú, naʻá Ne hū ki ha kolo ʻo mamata ki ha kau tangata ʻe toko hongofulu naʻa nau maʻu ha mahaki kili kovi ʻaupito naʻe ui ko e kiliá. Naʻe pau ke fakamamaʻo ʻa e kakai kiliá mei he tokotaha kotoa pē, ʻo aʻu ki honau ngaahi fāmilí, koeʻuhí ke ʻoua naʻa nau ʻai e kakai kehé ke nau puke.
Naʻe ui atu ʻa e kau tangatá kia Sīsū ʻo kole ange ke Ne fakamoʻui kinautolu. Naʻe talaange ʻe Sīsū ke nau ō ki he kau taulaʻeiki ʻi he koló. Ko e kau taulaʻeikí pē te nau lava ʻo tuʻutuʻuni pe te nau toe lava ʻo feohi mo e kakai kehé.
Luke 17:13–14; vakai foki, Levitiko 14:2–3
Naʻe hoko ha mana ʻi he ʻalu ʻa e kau tangata puke ʻe toko hongofulú ke ʻaʻahi ki he kau taulaʻeikí. Naʻe sai leva honau puké. Naʻe maʻa honau kiliá!
ʻI he mamata ha taha ʻo e kau tangatá kuo fakamoʻui iá, naʻá ne tafoki ʻo fakamālō leʻo lahi ki he ʻOtuá. Ko ha Samēlia ia.
Naʻe fakatōmapeʻe e tangatá ʻi he vaʻe ʻo Sīsuú ʻo fakamālō kiate Ia koeʻuhí ko e meʻa kuó Ne faí. Naʻe ʻeke ange ʻe Sīsū pe ko e fē ʻa e kau tangata kehe ʻe toko hiva naʻe fakamoʻuí. Ko e tangata pē ʻe toko taha ne toe foki mai ʻo fakamālō kiate Iá! Naʻe folofola ʻa Sīsū ki he tangatá, “Tuʻu hake, peá ke ʻalu: kuo fakamoʻui koe ʻe hoʻo tuí.”