Kuó Ne Toe Tuʻu
ʻOku ikunaʻi ʻe Sīsū Kalaisi ʻa e maté maʻá e kakai kotoa pē
Naʻe tuku ʻe he kau ākonga ʻa Sīsuú Hono sinó ki he fonualotó. Naʻa nau fiemaʻu ke fai ha meʻa lahi ange ke tokangaʻi Hono sinó, ka naʻe mei hoko ʻa e Sāpaté. Naʻa nau palani ke nau toe foki mai hili e ʻosi ʻa e Sāpaté.
ʻI he pongipongi ʻo e ʻaho hono tolu hili e pekia ʻa Sīsuú, naʻe ō atu ʻa Mele Makitaline mo ha niʻihi kehe ki he fonualotó.
ʻI heʻenau aʻu atú, naʻa nau fakatokangaʻi kuo tekaʻi e maka tāpuni ʻo e fonualotó. Naʻa nau hū ki he fonualotó, pea naʻe ʻikai ke ʻi ai e sino ʻo Sīsuú.
Naʻe lele ʻa Mele ke talaange kia Pita mo Sione kuo ʻave ʻe ha taha e sino ʻo Sīsuú. ʻOku lele ʻa Pita mo Sione ki he fonualotó.
ʻI heʻena aʻu atu ki he fonualotó, naʻe hū atu ʻa Pita mo Sione ki loto. Naʻá na mamata kuo pulia e sino ʻo Sīsuú. Naʻe kei ʻi ai pē ʻa e tupenu naʻe kofu ʻaki Iá.
Naʻe foki ʻa Pita mo Sione ki ʻapi, kae nofo ʻa Mele ʻi he fonualotó ʻo tangi. Naʻá ne vakai ki he fonualotó peá ne mamata ki ha ongo ʻāngelo. Naʻá na fehuʻi ange pe ko e hā ʻoku tangi aí. Naʻá ne pehē kuo ʻave ʻe ha taha ʻa e sino ʻo Sīsuú, pea naʻe ʻikai ke ne ʻiloʻi pe naʻe ʻifē.
Pea toki hāʻele mai ʻa Sīsū, ka naʻe ʻikai ʻilo ʻe Mele ko Ia ia. Naʻe fehuʻi ange ʻe Sīsū, “Fefine, ko e hā ʻokú ke tangi aí?” Naʻe fakakaukau ʻa Mele ko Ia ʻa e tangata tauhi ngoué. Naʻá ne ʻeke ange pe naʻá Ne ʻilo e feituʻu naʻe ʻi ai e sino ʻo Sīsuú.
Naʻe folofola ange ʻa Sīsū, “Mele.” Naʻá ne tafoki hake. Naʻá ne ʻiloʻi ko Sīsū ia! Naʻá ne lea ange kiate Ia, “ʻEiki.” Naʻe kole ange ʻe Sīsū ke ne tala ki he kau ākonga kehé naʻá Ne fiemaʻu ke hāʻele hake ki Heʻene Tamai Hēvaní. Naʻe maʻu ʻe Mele ʻa e kau ākonga kehé peá ne talaange kiate kinautolu kuó ne mamata kia Sīsū pea kuó Ne toe moʻui!
ʻI he efiafi ko iá, naʻe fakataha mai ha tokolahi ʻo e Kau ʻAposetoló. Naʻa nau tāpuniʻi ʻa e matapaá, ʻo manavasiʻi naʻa feinga e kau taki ʻo e kau Siú ke kumi kinautolu. Fakafokifā pē, naʻa nau mamata kia Sīsū ʻoku tuʻu ʻi honau lotolotongá. Naʻa nau tomuʻa ilifia. Naʻa nau fakakaukau ko ha laumālie Ia. Naʻe folofola ange ʻa Sīsū, “Fiemālie pē ʻa kimoutolu.”
Naʻe fakaafeʻi ʻe Sīsū ʻa e Kau ʻAposetoló ke ala ki Hono toʻukupú mo e toʻukupu kelekelé. Naʻá Ne finangalo ke nau ʻiloʻi ʻokú Ne maʻu ha sino, kae ʻikai ko ha laumālie pē. Naʻe aʻu pē ʻo ne taumafa ha ika mo ha huʻa hone mo kinautolu. Naʻe fiefia ʻaupito ʻa e kau ākongá ke mamata kiate Ia!
Naʻe tokoni leva ʻa Sīsū ki Heʻene Kau ʻAposetoló ke mahino kiate kinautolu ʻa e folofolá ʻa ia naʻe akonaki fekauʻaki mo ʻEne pekiá mo e Toetuʻú. Naʻá Ne finangalo ke nau akoʻi e taha kotoa pē te nau lava ʻo fakatomala pea fakamolemoleʻi kinautolu koeʻuhí ko Ia. ʻE hoko ʻa e Kau ʻAposetoló ko Hono kau fakamoʻoní.
Naʻe ʻikai ke ʻi ai ʻa e ʻAposetolo ko Tōmasí ʻi he taimi naʻe hāʻele mai ai ʻa Sīsuú. Naʻá ne pehē he ʻikai ke ne tui naʻe moʻui ʻa Sīsū kae ʻoua kuó ne mamata ki he mataʻi faʻo ʻi Hono toʻukupú.
Hili ha ʻaho ʻe valu mei ai, naʻe toe fakataha mai ʻa e kau ākongá. Naʻe toe hā mai ʻa Sīsū. ʻI he taimi ko ʻení, naʻe ʻi ai ʻa Tōmasi.
Naʻe fakaafeʻi ʻe Sīsū ʻa Tōmasi ke ala ki he ngaahi matakafo ʻi Hono toʻukupú mo e vakavaká. Naʻá Ne folofola ange kia Tōmasi, “ʻOua naʻá ke taʻetui, kae tui.” Naʻe lea ange ʻa Tōmasi, “Ko hoku ʻEiki mo hoku ʻOtua.” Kuo tui ʻeni ʻa Tōmasi naʻe toetuʻu ʻa Sīsū. Naʻe folofola ange ʻa Sīsū ʻoku tāpuekina e kakaí ʻi heʻenau tuí, neongo kapau kuo teʻeki ai ke nau mamata kiate Ia.