Talateu
Fekauʻaki mo e Fuakava Foʻoú
Ko e talanoa ʻo Sīsū Kalaisi mo Hono kau muimuí
ʻOku konga ʻe ua ʻa e Tohi Tapú: ko e Fuakava Motuʻá mo e Fuakava Foʻoú. ʻOku ʻi he Fuakava Motuʻá ha ngaahi tohi ʻa e kau palōfita mei he kuonga muʻá. Naʻe tohi ʻe ha niʻihi ʻo e kau palōfitá ni naʻe talaʻofa ʻa e ʻOtuá te Ne fekauʻi mai ha Fakamoʻui. Te Ne hoko ko e ʻAlo ʻo e ʻOtuá pea fakahaofi kitautolu mei he angahalá mo e maté kae lava ke tau toe nofo fakataha mo e ʻOtuá.
ʻĪsaia 53:3–5; Sēkope 7:11; Mōsese 4
ʻOku fakamatala ʻa e Fuakava Foʻoú ki he founga naʻe fakahoko ai ʻa e talaʻofa ko ʻení. ʻOkú ne fakamatala fekauʻaki mo e ʻaloʻi ʻo Sīsū Kalaisí, ko e ʻAlo ʻo e ʻOtuá.
ʻOku fakamatala foki ʻa e Fuakava Foʻoú fekauʻaki mo e moʻui ʻa Sīsuú. Naʻá Ne nofo ʻi he lotolotonga ʻo e kau Siú mo akoʻi kitautolu ʻi he founga ke tau moʻui aí kae lava ke tau foki ki he Tamai Hēvaní ʻi ha ʻaho.
Naʻe tāpuakiʻi mo tokoniʻi ʻe Sīsū ʻa e kakaí. Naʻá Ne fai ha ngaahi mana lahi maʻanautolu, ʻo hangē ko hono fakamoʻui ʻo e kakai naʻe puké mo toe fakamoʻui ʻa e kakai kuo pekiá.
Naʻe fili ʻe Sīsū ha toko hongofulu mā ua ʻi Hono kau muimuí ke nau hoko ko ha kau ʻAposetolo. Naʻá Ne ʻoange kiate kinautolu ʻa e mafai ke tataki Hono Siasí.
Koeʻuhí ko e ʻofa ʻa Sīsū ʻiate kitautolú, naʻá Ne toʻo ai kiate Ia ʻetau mamahí, loto-mamahí, mo e angahalá kotoa. Naʻá Ne pekia maʻatautolu. Hili mei ai ha ʻaho ʻe tolu, naʻá Ne ikunaʻi ʻa e maté pea toetuʻu! ʻOku moʻui ʻa Sīsū Kalaisi pea koeʻuhí ko Ia, te tau lava ʻo fakatomala mei heʻetau ngaahi angahalá pea toe moʻui hili ʻetau maté.
Naʻe tohi ʻa e kakai naʻa nau ʻiloʻi mo ʻofa ʻia Sīsuú fekauʻaki mo e ngaahi meʻá ni kotoa. Naʻe faitohi ʻEne Kau ʻAposetoló ke tokoni ki he kāingalotu ʻo e Siasí ke langaki ʻenau tui kia Sīsū Kalaisí. Kuo fakahaofi e ngaahi meʻa ne nau tohí ʻi ha ngaahi taʻu lahi. Te ke lava he taimí ni ʻo lau kinautolu ʻi he Fuakava Foʻoú mo ako e founga ke muimui ai kia Sīsū Kalaisí.