Ko e Fakamoʻui ʻe Sīsū ha Fefine mo Fakamoʻui e ʻOfefine ʻo Sailosí

Naʻe nofo ha tangata ko Sailosi mo hono uaifí mo e ʻofefiné ʻi ha kolo ofi ki he Tahi Kālelí. Ko ha taki ʻa Sailosi ʻi he falelotu lahí, ʻa ia naʻe ʻalu ki ai ʻa e kau Siú ke hū ki he ʻOtuá.

Maʻake 5:22

Naʻe puke lahi e ʻofefine ʻo Sailosí, ʻa ia naʻe kei taʻu 12 pē. Naʻá ne mei mate. Naʻe ʻiloʻi ʻe Sailosi naʻá ne fiemaʻu ha tokoni. Naʻá ne toe ʻiloʻi foki naʻe ʻi honau koló ʻa Sīsū.

Maʻake 5:22–23

Naʻe mavahe ʻa Sailosi mei hono ʻapí peá ne maʻu ʻa Sīsū. Naʻá ne tūʻulutui ʻi he veʻe vaʻe ʻo Sīsuú ʻo kole ange ke Ne fakamoʻui hono ʻofefiné. Naʻe ʻiloʻi ʻe Sailosi kapau ʻe tāpuakiʻi ʻe Sīsū hono ʻofefiné, te ne moʻui. Naʻe muimui ʻa Sīsū ʻia Sailosi ki hono ʻapí. Naʻe muimui ha kakai tokolahi ʻiate Ia.

Maʻake 5:23–24

Naʻe toe fiemaʻu foki ʻe ha fefine ʻi he kolo tatau pē ʻa e tokoni ʻa Sīsuú. Naʻá ne puke lahi ʻaupito ʻi ha taʻu ʻe 12. Kuó ne fakaʻaongaʻi kotoa ʻene paʻangá ki he kau toketaá, ka naʻe ʻikai lava ʻe ha taha ʻo fakamoʻui ia—naʻe fakaʻau pē ke toe kovi ange. Na‘á ne ʻiloʻi ʻe malava ‘e Sīsū ʻo fakamo‘ui ia. Ka te ne aʻu fēfē kiate Ia ʻi he fuʻu kakaí?

Maʻake 5:25–27

Naʻe tui ʻa e fefiné kapau te ne lava pē ʻo ala ki he kofu ʻo Sīsuú, ʻe fakamoʻui ia. Naʻá ne taufā kia Sīsū ʻi Heʻene hāʻele haké. ʻI heʻene ala pē ki he kapa ʻo Hono kofú, naʻe fakamoʻui ia.

Mātiu 9:20; Maʻake 5:27–29; Luke 8:44

Naʻe tuʻu ʻa Sīsū he taimi pē ko iá. Naʻá Ne ongoʻi ʻoku mole ha mālohi meiate Ia. “Ko hai kuo ala kiate aú?” Ko ʻEne fehuʻí ange ia. Naʻe puputuʻu ʻEne kau ākongá. Naʻe ala ha kakai tokolahi kiate Ia—naʻe ʻātakaiʻi kinautolu ʻe he kakaí. Naʻe ʻafio takai holo ʻa Sīsū ke ʻiloʻi pe ko hai naʻe ala kiate Iá.

Maʻake 5:30–32; Luke 8:45

Naʻe ʻafio ʻa Sīsū ki he fefine naʻe ala ki Hono kofú. Naʻá ne fakamatala kia Sīsū fekauʻaki mo ʻene puké, pea kuo fakamoʻui ia ʻe Sīsū. Naʻe folofola ange ʻa Sīsū ke fiemālie. Naʻe fakamoʻui ia koeʻuhí ko ʻene tui kiate Iá. Naʻá Ne folofola ange, “ʻAlu ʻi he fiemālie.”

Maʻake 5:33–34; Luke 8:47–48

Naʻe haʻu leva ha tangata mei he fale ʻo Sailosí. Naʻá ne pehē kuo fuʻu tōmui: Kuo ʻosi pekia e ʻofefine ʻo Sailosí. ʻOku ʻikai totonu ke toe hohaʻasi ʻe Sailosi ia ʻa Sīsū.

Maʻake 5:35

ʻI he fanongo pē ʻa Sīsū ki he meʻá ni, naʻá Ne folofola ange kia Sailosi, “ʻOua te ke manavahē, ka ke tui pē.” Naʻá na ō leva ki he fale ʻo Sailosí.

Maʻake 5:36–38

Naʻe taki ʻe Sailosi mo hono uaifí ʻa Sīsū ki he feituʻu naʻe tokoto ai hona ʻofefiné. Naʻe puke ʻe Sīsū e nima ʻo e kiʻi taʻahiné peá Ne folofola ange, “Tuʻu hake.”

Maʻake 5:41

ʻI he taimi pē ko iá, naʻe tuʻu hake e ʻofefine ʻo Sailosí mei hono mohengá. Naʻe ʻikai ke ne mate! Naʻe kole ange ʻe Sīsū kia Sailosi mo hono uaifí ke ʻomi ha meʻa ke ne kai. Naʻá na ofo ʻi he meʻa naʻe fai ʻe Sīsū maʻa hona ʻofefiné. Naʻá Ne kole ange ke ʻoua te nau tala ki he kakai kehé ʻa e mana ko ʻení.

Maʻake 5:42–43