ʻOku Foaki ʻe Sīsū e Ngaahi Kī ʻo e Lakanga Fakataulaʻeikí ki Heʻene Kau ʻAposetoló
“Te u langa hoku siasí ki he maká ni”
Naʻe fehuʻi ange ʻe Sīsū ʻi ha ʻaho ʻe taha ki Heʻene kau ākongá pe ko e hā e lau ʻa e kakaí ʻo kau kiate Iá. Naʻe tali ange ʻe Heʻene kau ākongá naʻe pehē ʻe he kakai ʻe niʻihi ko Sione Papitaiso Ia. Naʻe pehē ʻe ha niʻihi kehe ko ha palōfita Ia mei he Fuakava Motuʻá kuo toe foki mai.
Naʻe ʻeke leva ʻe Sīsū ki Heʻene kau ākongá pe ʻoku nau peheé ko hai Ia. Naʻe tali ange ʻe Pita, “Ko koe ko e Kalaisí, ko e ʻAlo ʻo e ʻOtua moʻui.”
Naʻe fiefia ʻa Sīsū ke fanongo ki hono lea ʻaki ʻeni ʻe Pitá. Naʻá ne talaange kia Pita naʻe ʻikai ke ne ʻilo mei he kakai kehé ʻa e tuʻunga totonu ʻo Sīsuú. Ka naʻe fakahā ia kiate ia ʻe he Tamai Hēvaní.
Naʻe talaange ʻe Sīsū kia Pita, “Te u langa hoku siasí ki he maká ni.” Pea naʻá Ne talaʻofa leva ke foaki kia Pita ʻa e ngaahi kī ʻo e lakanga fakataulaʻeikí, pe mafai mei he ʻOtuá, koeʻuhí ke ne lava mo e kau ʻAposetolo kehé ʻo tataki Hono Siasí ʻi he māmaní.
Hili ha ngaahi ʻaho siʻi mei ai, naʻe ʻave ʻe Sīsū ʻa Pita, Sēmisi, mo Sione ki ha moʻunga māʻolunga ke lotu.
Lolotonga e lotu ʻa Sīsuú, naʻe ulo Hono fofongá ʻo hangē ko e laʻaá. Naʻe hā ngingila foki mo Hono kofú.
Naʻe hā mai ha ongo palōfita mei he Fuakava Motuʻá, ko Mōsese mo ʻIlaisiā. Naʻá na talanoa mo Sīsū ʻo kau ki he ʻEne pekiá mo e Toetuʻú, ʻa ia ʻe vave ʻene hoko maí ʻi Selusalema. Naʻe talaange ʻe Pita kia Sīsū, “ʻEiki, ʻoku lelei ʻetau ʻi hení.”
Lolotonga e lea ʻa Pitá, naʻe ʻaofia kinautolu ʻe ha ʻao ngingila. Naʻa nau fanongo ki he leʻo ʻo e ʻOtuá ʻoku folofola mai ʻo pehē, “Ko hoku ʻAlo ʻofaʻangá ʻeni, ʻa ia ʻoku ou fiemālie lahi aí, fanongo kiate ia.” Naʻe manavahē ʻa Pita, Sēmisi, mo Sione ʻo tō ki he kelekelé.
Naʻe ala atu ʻa Sīsū ki Heʻene kau ʻAposetoló pea folofola atu, “Tuʻu hake, pea ʻoua ʻe mahavahē.” Naʻa nau hanga hake ki ʻolunga. Naʻe ʻosi mavahe ʻa Mōsese ia mo ʻIlaisiā. Naʻe maʻu ʻe Pita, Sēmisi, mo Sione ʻi he moʻunga ko ʻení ʻa e ngaahi kī ʻo e lakanga fakataulaʻeiki naʻe talaʻofa ange ʻe Sīsū kiate kinautolú.
Mātiu 17:7–9; vakai foki, Tokāteline mo e Ngaahi Fuakava 27:12–13