Mātiu 18:21–34
Ko e Talanoa Fakatātā ʻo e Tamaioʻeiki ʻOku ʻIkai Ke Ne Lava ʻo Fakamolemolé
Ko e akonaki ʻa Sīsū ʻo kau ki he fakamolemolé
ʻI ha ʻaho ʻe taha naʻe fai ai ʻe Pita ha fehuʻi mahuʻinga kia Sīsū. Naʻá ne fie ʻilo pe ʻoku totonu ke ne fakamolemoleʻi tuʻo fiha e kakaí ʻi he taimi ʻoku nau faiangahala aí. “Tuʻo fitu?” Ko e fehuʻi ange ia ʻa Pitá. Naʻe tali ʻe Sīsū e fehuʻi ʻa Pitá ʻaki hono fai ange ha talanoa pe talanoa fakatātā.
ʻI he talanoá, naʻe ʻi ai ha ʻeiki naʻe tokolahi ʻene kau tamaioʻeikí. Naʻe ʻi ia ha ha taha ʻo e kau tamaioʻeikí naʻe ʻi ai hono moʻua ki he tuʻí ʻa ia ko e talēniti ʻe taha mano. Ko ha fuʻu paʻanga lahi ia!
He ʻikai pē ke teitei lava e tamaioʻeikí ia ʻo totongi fakafoki hono moʻua ki he tuʻí. Naʻe pehē ʻe he tuʻí te ne fakatau atu ʻa e tamaioʻeikí mo hono fāmilí ke totongi ʻosi ʻaki e moʻuá.
ʻI he fanongo ʻa e tamaioʻeikí ki he meʻá ni, naʻá ne fakatōmapeʻe ki lalo. Naʻá ne kole ange ki he tuʻí ke tuku mai hano taimi lahi ange. Naʻá ne pehē ange, “Ke ke faʻa kātaki kiate au, pea te u totongi kotoa pē kiate koe.”
Naʻe ʻaloʻofa ʻa e tuʻí ki he tamaioʻeikí. Naʻá ne loto ke fakamolemoleʻi ia. Naʻe ʻikai toe fiemaʻu ke totongi fakafoki ʻe he tamaioʻeikí ʻa e paʻangá. Naʻá ne tauʻatāina ke ne ʻalu!
Naʻe ʻalu leva ʻa e tamaioʻeikí ʻo ʻiloʻi ha tangata naʻe ʻi ai hono moʻua kiate ia ko ha kiʻi paʻanga siʻisiʻi. Naʻá ne puke ia ʻo pehē ange, “Totongi mai kiate au ʻa ia ʻoku ʻaʻakú.”
Naʻe fakatōmapeʻe ʻa e tangatá. Naʻá ne pehē ange, “Ke ke faʻa kātaki kiate au, pea te u totongi kotoa pē kiate koe.” Ka naʻe ʻikai ke fakamolemoleʻi ia ʻe he tamaioʻeikí. Naʻá ne ʻave ia ki he fale fakapōpulá.
ʻI he taimi naʻe ʻiloʻi ai ʻe he tuʻí ʻa e meʻa naʻe hokó, naʻá ne kole ange ke sio ki he tamaioʻeikí. Naʻe fakamanatu ange ʻe he tuʻí ki heʻene tamaioʻeikí naʻe ʻosi fakamolemoleʻi hono fuʻu moʻua lahí. Naʻá ne talaange ki heʻene tamaioʻeikí naʻe totonu ke ne fakamolemoleʻi foki mo e tangata naʻe moʻua paʻanga ange kiate iá.
ʻOku ʻi ai hotau moʻua kotoa pē ʻa ia he ʻikai ke tau teitei lava ʻe kitautolu ʻo totongi. Naʻe fakamatalaʻi ʻe Sīsū kia Pita ʻoku fakamolemoleʻi kitautolu ʻe he ʻOtuá, pea ko ia ai ʻoku totonu ke tau fakamolemoleʻi ʻa e niʻihi kehé. Pea ʻoku ʻikai totonu ke tau ngata pē ʻi he tuʻo fitu ka ʻoku totonu ke tau loto-fiemālie maʻu pē ke fakamolemole.
Mātiu 18:22, 34–35; vakai foki, Mātiu 6:14; Tokāteline mo e Ngaahi Fuakava 64:9–10