ʻOku Fakamoʻoni ʻa Sīsū ki Hono Misioná

Naʻe ʻalu ʻa Sīsū ki Nāsaleti, ʻa ia naʻe nofo ai Hono fāmilí mo e ngaahi kaungāmeʻá. Ko e feituʻu ia naʻá Ne tupu hake aí. ʻI he ʻaho Sāpaté, naʻá Ne ʻalu ki he falelotu lahí, ʻa ia naʻe ʻalu ki ai e kakaí ke ako e folofolá mo hū ki he ʻOtuá.

Luke 4:16–17

Naʻe tuʻu ʻa Sīsū ʻi he falelotu lahí ʻo lau ha potufolofola mei he palōfita ko ʻĪsaiá. Naʻe pehē ʻe he folofolá ʻe ʻi ai e ʻaho ʻe hāʻele mai ai ha Fakamoʻui. Te Ne malanga ʻaki ʻa e ongoongoleleí ki he masivá mo fakamoʻui ʻa e loto kuo kafó. Te Ne tokoniʻi ʻa e kuí mo kinautolu ʻoku mamahí.

ʻĪsaia 61:1–2; Luke 4:17–19

Naʻe fakaʻosi ʻe Sīsū ʻene laú peá Ne ʻafio ki lalo. Naʻe siofi Ia ʻe he tokotaha kotoa. Naʻá Ne fakahā kiate kinautolu, ʻi he ʻaho pē ko iá, naʻe hoko moʻoni ai ʻa e potufolofola naʻá Ne laú. Ko Ia ʻa e Fakamoʻuí.

Luke 4:21

Naʻe fuʻu ʻohovale ʻaupito ʻa e kakai ʻo Nāsaletí ʻi he meʻa naʻe folofola ʻaki ʻe Sīsuú. ʻE lava fēfē ke hoko ʻa Sīsū ko e Fakamoʻuí? Naʻa nau fakakaukau ko e foha pē ia ʻo Mele mo Siosefa, kae ʻikai ko e ʻAlo ʻo e ʻOtuá. Naʻá Ne hangē kiate kinautolu ko ha tokotaha angamaheni pē.

Luke 4:22

Naʻe ʻafioʻi ʻe Sīsū naʻe fiemaʻu ʻe he kakaí ke Ne fai ha mana ke fakamoʻoniʻi ko e Fakamoʻuí Ia. Naʻá Ne akoʻi ko e ngaahi maná maʻá e kakai ʻoku tuí, pea taimi ʻe niʻihi naʻe fakahoko ʻe he ʻOtuá ha ngaahi mana maʻanautolu naʻe ʻikai ʻo ʻIsilelí koeʻuhí naʻa nau maʻu ha tui lahi ange. Naʻe ʻita ha niʻihi ʻo e kakai ʻi he falelotu lahí kia Sīsū.

Luke 4:23–28

Naʻa nau tuli ia mei he koló ʻo aʻu ki he tumutumu ʻo ha tafungofunga. Naʻa nau loto ke tekeʻi ia ʻi he lilifá.

Luke 4:28–29

Ka naʻe hola ʻa Sīsū mei he kakai naʻe ʻitá.

Luke 4:30

Koeʻuhí naʻe ʻikai ke nau fiemaʻu ʻa Sīsū ʻi Nāsaleti, naʻá Ne hāʻele ki ha kolo ʻe taha ke akonaki ai.

Luke 4:31–32