Mātiu 26; Luke 22; Sione 13–14
Ko e ʻOhomohe Fakaʻosí
ʻOku fakafeʻiloaki ʻe Sīsū ʻa e sākalamēnití
Naʻe ʻi Selusalema ʻa Sīsū mo ʻEne kau ʻAposetoló ke fakamanatu ʻa e Lakaatú. Naʻe kātoangaʻi ʻe he kakai Siú ʻa e Lakaatú ʻi he taʻu kotoa pē. Naʻe tokoni ia kiate kinautolu ke nau manatuʻi, ʻi he ngaahi taʻu lahi kuo hilí, naʻe hoko honau ngaahi fāmilí ko ha kau pōpula ʻi ʻIsipite, pea naʻe tokoniʻi kinautolu ʻe he ʻOtuá ke nau hola.
Lolotonga ʻenau ʻi Selusalemá, naʻe fakahoko ʻe Sīsū mo ʻEne Kau ʻAposetoló ha kātoanga maʻu meʻatokoni fakataha makehe. Kuo ʻamanaki atu ʻa Sīsū ke vahevahe ʻa e meʻatokoni ko ʻení mo kinautolu.
Hili ʻenau kaí, naʻe fakafonu ʻe Sīsū ha poulu ʻaki ha vai. Naʻe kamata ke Ne fufulu e vaʻe ʻo ʻEne Kau ʻAposetoló.
ʻI he hoko e taimi ʻo Pitá, naʻá ne fehuʻi pe ko e hā naʻe fai ai ʻeni ʻe Sīsuú. Ko e fufulu vaʻé ko ha meʻa ia naʻe mei faʻa fai pē ʻe he kau sevāniti.
Naʻe folofola ange ʻa Sīsū naʻá Ne fufulu honau vaʻé ke tā ha sīpinga maʻanautolu. Naʻá Ne finangalo ke nau fetokoniʻaki mo feʻofaʻaki ʻo hangē ko ʻEne ʻofa ʻiate kinautolú. Kapau naʻa nau fai ʻeni, ʻe ʻilo ai ʻe he kakaí ko ʻEne kau ākonga kinautolu.
Naʻe fakahā ʻe Sīsū ki Heʻene kau ākongá ʻe vavé ni pē Haʻane pekia. Naʻe talaange ʻe Pita naʻe loto fiemālie ia ke mate maʻa Sīsū.
Ka naʻe ʻafioʻi ʻe Sīsū ʻe hoko mai ha ngaahi taimi faingataʻa. Naʻá Ne folofola ange kia Pita kimuʻa pea ʻuʻua e moá ʻi he pongipongi hono hokó, ʻe lea tuʻo tolu ʻa Pita naʻe ʻikai te ne ʻiloʻi ʻa Sīsū.
Naʻe ʻafioʻi ʻe Sīsū ʻe ala hohaʻa mo ilifia ʻEne Kau ʻAposetoló. Naʻá Ne talaʻofa ange ʻe fekauʻi mai ʻe he ʻOtuá ʻa e Laumālie Māʻoniʻoní kiate kinautolu. ʻE fakafiemālieʻi, akoʻi, mo tokoniʻi kinautolu ʻe he Laumālie Māʻoniʻoní ke nau manatuʻi e meʻa naʻe akoʻi ange ʻe Sīsū kiate kinautolú. Naʻá Ne folofola ange ke ʻoua te nau hohaʻa pe ilifia. Naʻá ne folofola ange, “Kapau ʻoku mou ʻofa kiate au, fai ʻeku ngaahi fekaú.”
Pea naʻe fai leva ʻe Sīsū ha meʻa mātuʻaki makehe ke tokoni ki Heʻene Kau ʻAposetoló ke nau manatuʻi maʻu pē Ia. Naʻá Ne foaki ange kiate kinautolu ʻa e sākalamēnití. ʻUluakí, naʻá Ne tāpuakiʻi ʻa e maá, pakipaki ia, pea foaki ia ki Heʻene kau ʻAposetoló. Naʻe folofola ʻa Sīsū ke nau fakakaukau ki Hono sinó ʻi heʻenau kai ʻa e maá. Naʻá Ne kole ange ke nau manatuʻi te Ne pekia maʻanautolu.
Naʻe lingi leva ʻe Sīsū ʻa e uainé ki ha ipu. Naʻá Ne tāpuakiʻi ʻa e uainé mo folofola ki he kau ʻAposetoló ke nau inu ia. Naʻe folofola ʻa Sīsū ke nau fakakaukau ki Hono taʻataʻá ʻi heʻenau inu ʻa e uainé. Naʻá Ne kole ange ke nau manatuʻi te Ne mamahi, tautaʻa taʻataʻa, pea pekia koeʻuhí ko e mamahi mo e angahala ʻa e kakai kotoa pē kae lava ke tau fakatomala pea fakamolemoleʻi kitautolu.
Naʻe fakamatalaʻi leva ʻe Sīsū ʻokú Ne hangē ha fuʻu vainé, pea ʻoku hangē ʻEne kau ākongá ha ngaahi vaʻá. Kapau ʻoku ʻi ai ha vaʻa ʻoku fehokotaki mo e vainé, ʻe tupu ai ha fua. ʻOku mate ha vaʻa ʻoku ʻikai fehokotaki mo e vainé pea ʻikai lava ke tupu ai ha fua. Naʻe finangalo ʻa Sīsū ke ofi maʻu pē ʻEne kau ākongá kiate Ia ʻaki ʻenau feʻofaʻaki mo tauhi ʻEne ngaahi fekaú.
Hili hono akoʻi e ngaahi meʻá ni, naʻe hivaʻi ʻe Sīsū mo ʻEne Kau ʻAposetoló ha himi. Naʻa nau lue ki ha ngoue naʻe ui ko Ketisemani.