ʻOku Fakamoʻoni ʻa Sitīveni kia Sīsū Kalaisi
ʻOku foaki ʻe ha tamaioʻeiki loto-toʻa ʻene moʻuí koeʻuhí ko ʻene fakamoʻoní
Naʻe vave e tupu ʻa e Siasí. Naʻe fakaʻau ke faingataʻa ange ki he kau ʻAposetoló ke nau tokangaʻi kotoa e kāingalotú.
Naʻe fakakaukau ʻa e Kau ʻAposetoló ke ui ha kau tangata ʻe toko fitu ʻe lava ʻo tokoni. Naʻa nau kole ki he kāingalotú ke nau kumi ha kau tangata naʻe poto mo fonu ʻi he Laumālie Māʻoniʻoní.
Ko e taha ʻo e kakai naʻa nau filí ko Sitīveni. Naʻe foaki ange ʻe he kau ʻAposetoló ha tāpuaki. Naʻe maʻu ʻe Sitīveni ha tui lahi pea naʻá ne fakahoko ha ngaahi mana lahi ʻi he lotolotonga ʻo e kakaí.
Naʻe akonaki ʻa Sitīveni fekauʻaki mo Sīsū Kalaisi ʻi he poto pea ʻi he Laumālié. Ka naʻe ʻikai saiʻia e kau taki ʻo e falelotu lahí ʻi he meʻa naʻá ne akoʻí. Naʻa nau pehē naʻá ne lea fakafepaki kia Mōsese mo e ʻOtuá. Naʻa nau ʻomi ʻa Sitīveni ki he ʻao ʻo e taulaʻeiki lahí mo e kau taki kehé.
Naʻe hangē e fofonga ʻo Sitīvení ha fofonga ʻo ha ʻāngeló. Naʻá ne fakamanatu ki he kau takí naʻe fekauʻi mai ʻe he ʻOtuá ʻa Mōsese ke fakahaofi e kakai ʻIsilelí, ka naʻe ʻikai ke nau muimui maʻu pē kia Mōsese. Naʻe pehē ʻe Sitīveni naʻe hangē ʻa Mōsese ko Sīsū Kalaisí. Naʻe fekauʻi mai ʻe he ʻOtuá ʻa Sīsū ke fakahaofi Hono kakaí, ka naʻe ʻikai muimui ʻa e kau takí kiate Ia. Naʻe ʻita ʻa e kau takí kia Sitīveni.
Naʻe fonu ʻa Sitīveni ʻi he Laumālie Māʻoniʻoní, peá ne hanga hake ki he langí. Naʻá ne mamata kia Sīsū Kalaisi ʻoku tuʻu ʻi he tafaʻaki ʻo e Tamai Hēvaní.
ʻI he taimi naʻe talaange ai ʻe Sitīveni ki he kau takí ʻa e meʻa naʻá ne mamata ki aí, naʻa nau toe ʻita lahi ange. Naʻa nau kaikaila ʻi he ʻitá pea nau puke ʻa Sitīveni. Naʻa nau toho leva ia ki tuʻa mei he koló.
Naʻa nau tuku honau ʻū koté ʻi he vaʻe ʻo ha tangata ko Saula hono hingoá. Naʻa nau tolomakaʻi leva ʻa Sitīveni ke ne mate. Naʻe poupou ʻa Saula ki he meʻa naʻa nau faí. Naʻe lotu ʻa Sitīveni. Naʻá ne kole ki he ʻEikí ke fakamolemoleʻi ʻa e kakai naʻa nau fakamamahiʻi iá. Naʻá ne kole foki ki he ʻEikí ke tali hono laumālié ki he langí.