Mātiu 10; Luke 5:1–11; 6:12–16
ʻOku Fili ʻe Sīsū ʻEne Kau ʻAposetoló
Ko ha fakaafe ke hoko ko ha kau “toutai tangata”
ʻI ha ʻaho ʻe taha, naʻe omi e kakaí ki he Tahi Kālelí ke fanongo ki he akonaki ʻa Sīsuú. Naʻe akoʻi kinautolu ʻe Sīsū mei ha vaka lolotonga ʻenau fakafanongo mei he matāfangá. Ko e vaká ʻa ha tangata toutai ko Saimone.
ʻI he ʻosi e akonaki ʻa Sīsuú, naʻá Ne kole kia Saimone ke ʻave ʻa e vaká ki he konga loloto ʻo e tahí. Naʻá ne talaange kia Saimone ke lī hono kupengá ki he vaí ke maʻu ha ika. Naʻe pehē ʻe Saimone naʻá ne toutai ʻi he poó kakato pea ʻikai maʻu ha ika. Ka koeʻuhí naʻe kole ange ʻe Sīsū, te ne toe feinga pē.
Naʻe lahi e ika ne maʻu ʻe Saimoné ʻo motu ai hono kupengá! Naʻá ne ui ki hono ngaahi kaungāmeʻa ʻi ha vaka ʻe taha ke tokoni ange kiate ia. Ne ʻikai fuoloa kuo fonu ʻa e ʻū vaká ʻi he iká, pea kamata ke nau ngoto. Naʻe ofo ʻa Saimone mo hono ngaahi kaungāmeʻá!
Naʻe tūʻulutui ʻa Saimone ʻi he ʻao ʻo Sīsuú. Naʻá ne pehē, “[ʻE ʻEiki,] ko e tangata angahala au.” Naʻá ne ʻiloʻi naʻe fekauʻi mai ʻa Sīsū mei he ʻOtuá. Naʻe talaange ʻe Sīsū ke ʻoua ʻe manavahē.
Naʻe fakaafeʻi ʻe Sīsū ʻa Saimone, hono tokoua ko ʻAniteluú, mo hono kaungāmeʻa ko Sēmisi mo Sioné, ke nau muimui ʻiate Ia. Te nau tokoniʻi e kakaí ke nau haʻu kia Sīsū, kae ʻikai toe toutai ika.
Naʻe liʻaki ʻe Saimone, Sēmisi, mo Sione honau vaka toutaí pea hoko ko e kau ʻAposetolo ʻa Sīsū. Kimui ange aí, naʻe ʻoange ʻe Sīsū kia Saimone ʻa e hingoa ko e Pita. Ko e ʻAposetoló ko ha fakamoʻoni makehe ia ʻo Sīsū Kalaisi. Naʻe ui ʻe Sīsū ha kau tangata ʻe toko 12 ke nau hoko ko ʻEne kau ʻAposetolo. Naʻá Ne lotua ke ʻiloʻi pe ko hai ʻoku totonu ke Ne uí. Naʻá Ne foaki ki Heʻene kau ʻAposetoló ʻa e mafai ʻo e lakanga fakataulaʻeikí ke tataki Hono Siasí.
Koeʻuhí naʻe maʻu ʻe he kau ʻAposetoló ʻa e mālohi ʻo e ʻOtuá, naʻa nau lava foki ʻo fakamoʻui ʻa e kakai naʻe puké, fakamoʻui ʻa e kakai kuo pekiá, pea fai mo ha ngaahi mana kehe.
Naʻe fekauʻi atu ʻe Sīsū ʻEne kau ʻAposetoló ki ha ngaahi kolo lahi ke akoʻi ʻEne ongoongoleleí. Naʻá Ne pehē ʻe tokoniʻi kinautolu ʻe he Laumālie Māʻoniʻoní ke nau ʻiloʻi ʻa e meʻa ke nau lea ʻakí. Naʻe pehē ʻe Sīsū he ʻikai saiʻia ha kakai ʻe niʻihi ʻi he meʻa te nau akoʻí, ka ʻi heʻenau ngāue faivelengá, ʻe ʻiate kinautolu ʻa e ʻOtuá.