Ko e Akonaki ʻa Sīsū ʻi he Malanga ʻi he Moʻungá
Tokoniʻi kitautolu ke tau hoko ʻo tatau ange mo ʻetau Tamai Hēvaní
Naʻe hāʻele ʻa Sīsū mo ʻEne kau ākongá ki ha moʻunga ofi ki he Tahi Kālelí. Naʻe akoʻi ai kinautolu ʻe Sīsū ki he founga te tau lava ai ʻo fiefia mo hoko ʻo tatau ange mo ʻetau Tamai Hēvaní.
Naʻe akoʻi ʻe Sīsū ʻoku tāpuekina mo fiefia ʻa e kakaí ʻi heʻenau loto-fakatōkilaló, loto-maʻá, mo feinga ke fai ʻa e meʻa ʻoku totonú. ʻE lava ke fakamolemoleʻi ʻa e kakai ʻoku nau fakamolemoleʻi ʻa e niʻihi kehé. ʻE ui ʻa e kakai ʻoku faʻa fakaleleí ko e fānau ʻa e ʻOtuá.
Naʻe folofola ʻa Sīsū ko ʻEne kau ākongá ko ha maama kinautolu ki he māmaní—hangē ko ha kolo ʻi ha tafungofunga ʻoku lava ke mamata ki ai e taha kotoa. ʻOku ʻikai totonu ke tau fūfuuʻi ʻetau māmá.
ʻI heʻetau muimui kia Sīsuú, ʻoku tau hangē ha foʻi teʻelango ʻokú ne fakamaama ʻa e tokotaha kotoa pē ʻi he lokí. ʻE lava ke tokoni ʻetau ngaahi ngāue leleí ki he kakaí ke nau tui ki he Tamai Hēvaní.
Naʻe folofola ʻa Sīsū ʻoku totonu ke tau ʻofa ʻi he tokotaha kotoa pē—ʻo aʻu pē ki he kakai ʻoku ʻikai ke nau ʻofa ʻiate kitautolú. ʻOku totonu ke tau hūfia kinautolu. Naʻe akoʻi ʻe Sīsū ʻoku totonu ke tau feinga ke tatau mo ʻetau Tamai Hēvaní. Naʻá Ne akoʻi ʻi heʻetau tokoniʻi ʻa e kakaí, ʻoku ʻikai fiemaʻu ia ke tau tala ki he taha kotoa ʻa e meʻa naʻa tau faí. ʻOku ʻafioʻi ʻe he ʻOtuá ʻa e ngaahi meʻa lelei ʻoku tau faí, pea te Ne tāpuakiʻi kitautolu.
ʻI heʻetau lotú, ʻoku ʻikai totonu ia ke tau hohaʻa ki he fakakaukau mai ʻa e kakaí kiate kitautolú. ʻOku ʻikai totonu ke tau lea ʻaki ʻa e ngaahi lea tatau ʻi he taimi kotoa pē kapau ʻoku ʻikai ke tau fuʻu ʻuhingaʻi ia. ʻOku totonu ke tau lea mei hotau lotó. ʻOku fanongo mai ʻa e Tamai Hēvaní ki heʻetau ngaahi lotú mo ʻafioʻi ʻa e meʻa ʻoku tau fiemaʻú. Naʻa mo e taimi ʻoku ʻikai lava ai ha taha kehe ʻo fanongo maí, te Ne lava.
Naʻe akoʻi ʻe Sīsū ʻoku ʻikai totonu ke tau fakakaukau ʻoku tau lelei ange ʻi he kakai kehé. ʻOku totonu ke tau manatuʻi ʻoku tau maʻu kotoa ha ngaahi faingataʻa. ʻOku totonu ke tau fakakaukau ki he founga ʻe lava ke tau toe lelei ange aí, kae ʻikai fakamāuʻi e niʻihi kehé. ʻOku totonu tau fai ki he niʻihi kehé ʻa e meʻa tatau ʻoku tau loto ke fai mai kiate kitautolú.
Naʻe fai leva ʻe Sīsū ha talanoa fekauʻaki mo ha tangata vale naʻá ne langa hono falé ʻi he ʻoneʻoné pea mo ha tangata poto naʻá ne langa hono falé ʻi ha funga maka. ʻI he tō mai ʻa e ʻuhá, naʻe holo ʻa e fale ʻi he ʻoneʻoné, pea naʻe tuʻu maʻu pē ʻa e fale ʻi he funga maká. Naʻe folofola ʻa Sīsū kapau te tau fanongo ki Heʻene ngaahi akonakí pea muimui ki ai, ʻoku tau hangē ai ko e tangata potó.