ʻOku Fafanga ʻe Sīsū ha Kakai ʻe Lauiafe
Ko Ia ʻa e Mā ʻo e Moʻuí
Naʻe ʻafioʻi ʻe Sīsū kuo fakapoongi ʻa Sione Papitaiso. Naʻá Ne ʻalu ki ha feituʻu mamaʻo mei he ngaahi koló koeʻuhí ke Ne lava ʻo maʻu ha kiʻi taimi tokotaha pē.
ʻI he fanongo ʻa e kakaí ki he feituʻu naʻe hāʻele ki ai ʻa Sīsuú, naʻa nau muimui ʻiate Ia. Naʻe mamata ʻa Sīsū kiate kinautolu, pea naʻá Ne ongoʻi ha ʻofa kiate kinautolu. Naʻá Ne fakaʻaongaʻi e ʻahó kakato ke tāpuakiʻi mo fakamoʻui kinautolu.
ʻI he fakaʻosinga ʻo e ʻahó, naʻe fakaʻau ke fiekaia ʻa e kakaí. Naʻe fakakaukau ʻa e Kau ʻAposetoló ʻoku totonu ke fekauʻi atu ʻe Sīsū ʻa e kakaí ke nau foki ki he ngaahi koló ke ʻomi ha meʻakai. Ka naʻe finangalo ʻa Sīsū ke nau nofo. Naʻá Ne kole ki he kau ʻAposetoló ke ʻoange ki he kakaí ha meʻa ke nau kai.
Naʻe maʻu ʻe he ʻAposetolo ko ʻAniteluú ha kiʻi tamasiʻi naʻe ʻi ai haʻane foʻi mā ʻe nima mo ha kiʻi mataʻi ika ʻe ua ke foaki ki he kakaí. Ka naʻe ʻi ai ha kau tangata ʻe toko 5,000, pea mo e houʻeiki fafine mo e fanau, naʻe fiemaʻu ke nau kai. Te nau lava fēfē ʻo fafanga ha kakai tokolahi ʻaki ha kiʻi meʻakai siʻisiʻi pehē?
Naʻe kole ʻe Sīsū ki he Kau ʻAposetoló ke ʻomi kiate Ia ʻa e meʻakaí. Naʻá Ne folofola ki he kakaí ke nau tangutu ʻi he musié. Naʻe lotu leva ʻa Sīsū ke fakamālō ki he Tamai Hēvaní koeʻuhí ko e maá mo e iká pea tāpuakiʻi ia. Naʻá Ne pakipaki leva ʻa e maá mo e iká.
Naʻe kole ʻe Sīsū ki Heʻene kau ʻAposetoló ke tufa ʻa e maá mo e iká ki he kakaí. Naʻe kai ʻa e tokotaha kotoa pē, pea naʻa nau fiu kotoa. Hili ʻenau kaí, naʻe kei toe ai ha kato meʻakai fonu ʻe 12!
‘I he ʻaho hono hokó, naʻe foki mai ʻa e kakaí ʻo toe ʻilo ʻa Sīsū. Ka naʻe ʻafioʻi ʻe Sīsū ko honau tokolahi naʻa nau muimui pē kiate Ia koeʻuhí he naʻá Ne foaki ange ha meʻakai kiate kinautolu. Naʻe fakamanatu ange ʻe Sīsū kiate kinautolu ʻoku taimi nounou pē ʻa e meʻakaí. Naʻe ʻi ai ha meʻa lelei ange ke ne foaki maʻanautolu.
Naʻe folofola ʻa Sīsū, “Ko au ko e mā ʻo e moʻuí.” ʻOku foaki mai ʻe he maá ʻa e moʻui ʻi he māmaní. Ka ʻe lava ke foaki mai ʻe Sīsū Kalaisi ʻa e moʻui taʻengata mo e Tamai Hēvaní.
Naʻe ʻikai saiʻia ha kakai tokolahi ʻi he meʻa naʻe feinga ʻa Sīsū ke akoʻí. Naʻa nau mavahe pea fili ke ʻoua ʻe toe muimui ʻia Sīsū.
Ne ʻeke ʻe he Fakamoʻuí ki Heʻene Kau ʻAposetoló, “ʻE ʻalu mo kimoutolu foki?” Naʻe tali ange ʻe Pita, “ʻEiki, te mau ʻalu kia hai? ʻOku ʻiate koe ʻa e ngaahi lea ʻo e moʻui taʻengatá.” Naʻe ʻikai ʻalu ʻa e Kau ʻAposetoló. Naʻa nau ʻiloʻi ko Sīsū Kalaisi ʻa e Fakamoʻuí mo e ʻAlo ʻo e ʻOtuá.