Ko Sīsū ʻi he Anovai ʻo Petesetá
Ko hono fakamoʻui ha tangata naʻe puke fuoloa
Naʻe ʻi ai ha feituʻu ʻi Selusalema naʻe ui ko e Anovai ʻo Petesetá. Naʻe tui e kakaí naʻe maʻu ʻe he anovai ko ʻení ha ngaahi mālohi faifakamoʻui. Naʻe haʻu ki he vai kaukau ko ʻení ha kakai tokolahi naʻe puke, kui, pe ʻikai lava ʻo lue.
Naʻe tui ʻa e kakaí, ʻi he ngaahi taimi pau, naʻe ʻalu hifo ha ʻāngelo ʻo ueʻi ʻa e vai ʻi he anovaí. Ko e fuofua tokotaha ke hifo ki he vaí hili hono ueʻí ʻe fakamoʻui ia mei ha faʻahinga mahaki pē naʻá ne maʻu. Naʻe feinga ha kakai tokolahi ke nau fuofua hifo ki he vaí.
Ko e taha ʻo e kakai ʻi he vai kaukaú ko ha tangata naʻe ʻikai lava ʻo lue. Kuó ne puke ʻi ha taʻu ʻeni ʻe 38. Naʻá ne fie hifo ki he loto vaí ke fakamoʻui ia, ka ko e taimi kotoa pē naʻá ne feinga aí, naʻe tomuʻa hifo ha taha kehe.
ʻI ha ʻaho Sāpate ʻe taha, naʻe ʻi Selusalema ai ʻa Sīsū. ʻI Heʻene lue atu ʻi he loto koló, naʻá Ne haʻu ki he Anovai ʻo Petesetá ʻo mamata ki he tangata ʻoku tokoto aí.
Naʻe ʻafioʻi ʻe Sīsū kuo fuoloa e puke ʻa e tangatá pea naʻe ʻikai ke ne lava ʻo lue. Naʻe fehuʻi ange ʻe Sīsū pe ʻokú ne loto ke fakamoʻui ia.
Naʻe talaange ʻe he tangatá kia Sīsū naʻe ʻikai ha taha ke tokoniʻi ia ke ne aʻu ki he anovaí, pea ʻi he taimi naʻe ueʻi ai ʻa e vaí, ʻe muʻomuʻa maʻu pē ha niʻihi kehe ʻiate ia.
Naʻe folofola ʻa Sīsū ki he tangatá, “Tuʻu hake, pea toʻo ho mohengá, ʻo ʻalu.” Naʻe fakamoʻui ʻa e tangatá, ʻi he taimi pē ko iá! Naʻá ne tuʻu hake leva ʻo toʻo hono mohengá. Ko e fuofua taimi ia ʻi ha taʻu ʻe 38 ke ne lava ai ʻo lue!
Naʻe mamata ʻa e kau taki ʻo e kau Siú ki he tangata ʻokú ne toʻotoʻo hono mohengá. Naʻa nau pehē naʻe ʻikai ke ne fakaʻapaʻapaʻi ʻa e ʻaho Sāpaté, he naʻa nau fakakaukau ʻoku hangē hono toʻotoʻo hono mohengá ko e ngāué. Naʻe fakamatala ange ʻe he tangatá naʻe toki fakamoʻui pē ia, pea naʻe talaange ʻe he tokotaha naʻá ne fakamoʻui iá ke toʻo hono mohengá.
Naʻe ʻilo ʻe he kau takí ko Sīsū naʻá Ne fakamoʻui ʻa e tangatá mo folofola ke toʻo hono mohengá ʻi he ʻaho Sāpaté. Naʻa nau ʻita kia Sīsū pea naʻa nau loto ke tāmateʻi Ia. Naʻe folofola ange ʻa Sīsū naʻá Ne fai pē ʻa e ngaahi meʻa naʻe akoʻi ange ʻe Heʻene Tamai Hēvaní ke Ne faí.