Sākeasi ko e Tangata Tānaki Tukuhaú
ʻOku kaka ʻi ha fuʻu ʻakau ke mamata kia Sīsū
Naʻe ʻaʻahi ʻa Sīsū ki he kolo ko Selikoó. Naʻe nofo ai ha tangata ko hono hingoá ko Sākeasi. Ko Sākeasí ko ha tangata tānaki tukuhau koloaʻia. Naʻe ʻikai ke saiʻia ʻa e tokolahi taha ʻo e kakaí ʻi he kau tānaki tukuhaú. Naʻa nau fakakaukau naʻe toʻo ʻe he kau tānaki tukuhaú ha fuʻu paʻanga lahi mei he kakaí.
Naʻe fanongo ʻa Sākeasi naʻe ʻi he koló ʻa Sīsū. Naʻá ne fie ako lahi ange fekauʻaki mo Ia. Naʻá ne feinga ke ʻalu ʻo mamata kia Sīsū, ka naʻe ʻikai lava he naʻe fuʻu tokolahi e kakai naʻa nau takatakai ʻiate iá, pea fuʻu nounou ʻa Sākeasi ke lava ʻo vakai atu ʻi ʻolunga ʻiate kinautolu. Te ne lava fēfē ʻo mamata kia Sīsuú?
Naʻe lele muʻa atu ʻa Sākeasi ʻo ne kaka ʻi ha fuʻu ʻakau kae lava ke ne mamata kia Sīsū. ʻI he fakalaka atu ʻa Sīsuú, naʻá Ne ʻafio atu kia Sākeasi ʻi he fuʻu ʻakaú. Naʻe ui ʻe Sīsū hono hingoá mo folofola atu, “ʻAlu hifo.” Naʻe fie ʻaʻahi ʻa Sīsū kiate ia ʻi hono falé. Naʻe fakavave hifo ʻa Sākeasi mei he fuʻu ʻakaú. Naʻá ne fuʻu fiefia ke hāʻele mai ʻa Sīsū ki hono falé.
Naʻe fifili ʻa e kakai ʻi Selikoó pe ko e hā ʻe fie hāʻele ai ʻa Sīsū ki he fale ʻo Sākeasí. Naʻa nau fakakaukau ko ha tangata faiangahala ʻa Sākeasi he ko ha tangata tānaki tukuhau ia.
Naʻa talaange ʻe Sākeasi kia Sīsū, “ʻOku ou foaki hono vaeua ʻo ʻeku koloá ki he masivá.” Naʻá ne talaange kapau te ne toʻo ha fuʻu paʻanga lahi mei ha taha, te ne toe fakafoki ʻo lahi ange kiate kinautolu. Naʻe folofola ange ʻa Sīsū kia Sākeasi, “Kuo hoko ʻi he ʻahó ni ʻa e fakamoʻuí ki he falé ni.” Naʻe folofola ʻa Sīsū naʻá Ne haʻú ke kumi mo fakahaofi ʻa e kakai naʻe heé.