ʻOku Maʻu ʻe Koniliusi mo Hono Ngaahi Kaungāmeʻá ʻa e Laumālie Māʻoniʻoní
Ko e ongoongoleleí maʻá e tokotaha kotoa pē
Naʻe hoko ʻa Koniliusi ko ha taki ʻo e kau sōtia Lomá. Naʻá ne tui mo hono fāmilí ki he ʻOtuá, ka naʻe ʻikai ko ha kau Siu kinautolu pea naʻe ʻikai ke nau ʻilo fekauʻaki mo Sīsū Kalaisi. Naʻe vahevahe ʻe Koniliusi ʻa e meʻa naʻá ne maʻú ki he kakai masivá peá ne lotu maʻu pē ki he ʻOtuá.
ʻI ha hoʻatā ʻe taha, naʻe haʻu ai ha ʻāngelo kia Koniliusi lolotonga ʻene ʻaukai mo lotú. Naʻe pehē ange ʻe he ʻāngeló, “Koniliusi, kuo ongo hoʻo huú.” Kuo ʻafioʻi ʻe he ʻOtuá ʻene angaʻofá. Naʻe talaange ʻe he ʻāngeló kia Koniliusi ke kumi ʻa e ʻAposetolo ko Pitá, ʻa ia naʻe nofo ʻi ha kolo naʻe ui ko Sopa. ʻE talaange ʻe Pita kia Koniliusi ʻa e meʻa ke faí.
Naʻe tala ʻe Koniliusi ki heʻene kau tamaioʻeikí ʻa e meʻa naʻe lea ʻaki ʻe he ʻāngeló. Naʻá ne fekauʻi kinautolu ki Sopa ke kole kia Pita ke haʻu ʻo ʻaʻahi mai kiate ia.
ʻI Sopá, naʻe ʻi he ʻato ʻo e falé ʻa Pita ʻo lotu. Naʻá ne fiekaia pea teu ke ne ʻalu ʻo kai, pea fakafokifā pē kuó ne mamata ki ha mata meʻa-hā-mai.
Naʻe mamata ʻa Pita ki ha fuʻu tupenu lahi ʻoku ʻalu hifo mei he langí, ʻoku fonu ʻi he faʻahinga kotoa pē ʻo e fanga monumanú mo e manupuná. Naʻe fanongo leva ʻa Pita ki ha leʻo naʻe pehē mai ʻoku totonu ke ne kai ʻa e fanga monumanu ko iá. Ka ko e fanga monumanu ʻeni naʻe ʻikai ngofua ke kai ʻe he kakai Siú. Naʻe pehē ʻe he fono ʻa Mōsesé naʻa nau taʻemaʻa. Naʻe ʻikai loto ʻa Pita ke ne kai ai.
Naʻe pehē ʻe he leʻó kapau kuo fakamaʻa ʻe he ʻOtuá ha meʻa, ʻoku ʻikai totonu ke ui ia ko e taʻemaʻa. Naʻe toutou hoko tuʻo tolu ʻa e mata meʻa-hā-maí. Naʻe fifili ʻa Pita pe ko e hā hono ʻuhingá.
ʻI he taimi pē ko iá, naʻe talaange ʻe he Laumālié kia Pita ʻoku kumi ia ʻe ha kau tangata ʻe toko tolu. Naʻe folofola ange ʻa e Laumālié, “Mou ō mo kinautolu … he kuó u fekau ʻa kinautolu.”
Ko e kau tangata ʻe toko tolú ko e kau tamaioʻeiki kinautolu ʻa Koniliusí. Naʻa nau fakamatala kia Pita fekauʻaki mo e ʻāngelo naʻe mamata ki ai ʻa Koniliusí pea nau kole ange kia Pita ke haʻu muʻa ʻo akoʻi ia. Naʻe ʻikai faʻa hū ʻa e kau Siú ki he ngaahi ʻapi ʻo e kakai naʻe ʻikai ko ha kau Siú, pea naʻe ʻikai akoʻi ʻe he kau ʻAposetoló ʻa e ongoongoleleí kiate kinautolu. Ka ʻi hono manatuʻi ʻe Pita ʻene mata meʻa-hā-maí, naʻá ne fakakaukau ke ne ʻalu.
ʻI he aʻu atu ʻa Pitá, naʻe tatali mai ʻa Koniliusi kiate ia mo ha ngaahi kaungāmeʻa tokolahi mo ha kau mēmipa ʻo hono fāmilí. Naʻá ne talaange kia Pita kuo nau mateuteu ke fanongo ki ha meʻa pē naʻe fekau ʻe he ʻOtuá ke ne talaange kiate kinautolu.
Kuo mahino ʻeni kia Pita ʻa e meʻa naʻe akoʻi ange ʻe he ʻOtuá kiate ia ʻi he mata meʻa-hā-maí. Naʻe talaange ʻe Pita ki he tokotaha kotoa pē ʻoku ʻikai ʻofa ʻa e ʻOtuá ʻi ha puleʻanga pē taha pe falukunga kakai ʻo lahi ange ia ʻi ha puleʻanga mo ha kakai kehe. ʻOku tali ʻe he ʻOtuá ha taha pē ʻoku muimui kiate Ia mo fai ʻa e meʻa ʻoku totonú. Naʻe akoʻi ʻe Pita ʻa Koniliusi mo hono fāmilí mo e ngaahi kaungāmeʻá fekauʻaki mo Sīsū Kalaisi.
Lolotonga ʻene akoʻí, naʻe hāʻele mai ʻa e Laumālie Māʻoniʻoní ki he tokotaha kotoa pē naʻe fanongó. Naʻe fakaafeʻi kinautolu ʻe Pita ke nau papitaiso ʻi he huafa ʻo Sīsū Kalaisí. Naʻe ʻilo ʻe Pita ʻoku talitali lelei ʻa e fānau kotoa ʻa e ʻOtuá ʻi he Siasi ʻo Sīsū Kalaisí. Naʻe malangaʻi ʻa e ongoongolelei ʻo Sīsū Kalaisí ki he tokotaha kotoa pē.