Ko e Tamasiʻi ko Sīsuú
Ako mo tupulakí
Naʻe tupu hake ʻa Sīsū ʻi he kolo ko Nāsaletí mo Mele mo Siosefa. ʻI he fakalau ʻa e taimí, naʻá Ne ako lahi ange fekauʻaki mo e Tamai Hēvaní. Naʻá Ne teuteu ki he ngāue naʻe finangalo ʻa e Tamai Hēvaní ke Ne faí.
Luke 2:39–40; Tokāteline mo e Ngaahi Fuakava 93:12–14
ʻI he taʻu 12 ʻa Sīsuú, naʻá Ne ʻalu ki Selusalema mo hono fāmilí mo e ngaahi kaungāmeʻá ke fakamanatu ʻa e Lakaatú. Naʻa nau nofo ai ʻi ha ngaahi ʻaho lahi.
Naʻe fakatokangaʻi ʻe Mele mo Siosefa ʻi heʻenau foki ki ʻapí ʻoku ʻikai ʻiate kinaua ʻa Sīsū. Naʻá na foki ki Selusalema ke kumi Ia. Naʻá na fuʻu hohaʻa ʻaupito.
Hili ha fekumi ʻa Mele mo Siosefa ʻi ha ʻaho ʻe tolu, naʻe faifai peá na ʻilo ʻa Sīsū. Naʻá ne ʻi he temipalé, ʻo talanoa mo ha kau faiako fekauʻaki mo e folofolá. Naʻe fai ange ʻe he kau faiakó ha ngaahi fehuʻi kiate Ia. Naʻa nau ofo ʻi he lahi ʻo e meʻa naʻe ʻafioʻi mo mahino kia Sīsuú!
Naʻe talaange ʻe Mele kia Sīsū ʻena hohaʻa lahi ʻi he ʻikai ke na maʻu Iá. Naʻe folofola ange ʻa Sīsū naʻá Ne fai e ngāue ʻa ʻEne Tamai Hēvaní. Naʻe foki ʻa Sīsū ki Nāsaleti mo Hono fāmilí. Naʻá Ne talangofua kia Mele mo Siosefa.
Naʻe hokohoko atu e ako ʻa Sīsuú. Naʻe fakaʻau ke Ne tupu lahi mo mālohi ange. Naʻe ʻofa ʻa e Tamai Hēvaní ʻiate Ia mo tokoni ʻi ke Ne teuteu ki Hono misioná. Naʻe ʻofa ʻa Sīsū ʻi he kakai naʻe feohi mo Iá, pea naʻa nau ʻofa ʻiate Ia.