ʻOku Akoʻi ʻe Sīsū fekauʻaki mo e Kelekelé, Tengaʻi ʻAkaú, Maá, mo e Mataʻitofé
Ngaahi talanoa faingofua ke tokoni ke mahino kiate kitautolu ʻa e ngaahi moʻoni fakalaumālié
Naʻe faʻa fai ʻe Sīsū ha ngaahi talanoa naʻe ui ko e ngaahi talanoa fakatātā. ʻI he ngaahi talanoa fakatātaá, naʻe fakafehoanaki ai ʻe Sīsū ʻa e ngaahi meʻa angamaheni fakaʻahó, ki he ngaahi moʻoni mahuʻinga fekauʻaki mo ʻEne ongoongoleleí. Ke mahino ʻa e ngaahi talanoa fakatātaá, naʻe pau ke fakafanongo fakalelei Hono kau muimuí mo fakakaukau lahi ange ki honau ʻuhingá. Naʻe tokoni ʻa e ngaahi talanoa fakatātaá ke nau ako fekauʻaki mo e puleʻanga ʻo e ʻOtuá.
ʻI ha talanoa fakatātā ʻe taha, naʻe ʻalu ai ha tangata ki ha ngoue ke tō ha ngaahi tengaʻi ʻakau. Naʻá ne fakamoveteveteʻi ha ngaahi tengaʻi ʻakau lahi ʻi he ngoué. Naʻe tō ʻa e tengaʻi ʻakaú ʻi ha faʻahinga kehekehe ʻo e kelekelé.
Naʻe tō ha ngaahi tengaʻi ʻakau ʻe niʻihi ʻi ha hala kelekele fefeka, ʻa ia he ʻikai ke nau teitei lava ʻo tupu ai. Naʻe haʻu ʻa e fanga manupuná ʻo kai ʻa e ngaahi tengaʻi ʻakau naʻe tō aí.
Naʻe tō ha ngaahi tengaʻi ʻakau ʻe niʻihi ʻi he kelekele makamaká. Naʻe tupu vave hake ʻa e tengaʻi ʻakaú, ka naʻe ʻikai lava ke tupu ʻa e ngaahi aká koeʻuhí ko e maká. ʻI he taimi naʻe vela aí, naʻe mate ʻa e ʻakaú.
Naʻe tō ha ngaahi tengaʻi ʻakau ʻe niʻihi ʻi he kelekele fonu ʻi he vao talatalá. Koeʻuhí ko e vao talatalá, naʻe ʻikai lava ke tupu ʻa e tengaʻi ʻakaú.
Naʻe tō mo ha ngaahi tengaʻi ʻakau kehe ʻi he kelekele leleí. Naʻa nau hoko ko ha ʻuluʻakau mālohi mo moʻui lelei. Naʻa nau fakatupu ha ngaahi fua lahi.
Ke tokoni ke mahino ki Heʻene kau ākongá, naʻe fakamatalaʻi ʻe Sīsū ʻa e ʻuhinga ʻo ʻEne talanoa fakatātaá. ʻOku hangē ʻa e ngaahi tengaʻi ʻakaú ko e folofola ʻa e ‘Otuá. ʻOku hangē ʻa e faʻahinga kehekehe ʻo e kelekelé ko e loto ʻo e kakaí pea mo e ngaahi founga kehekehe ʻenau fakafeangai ʻi heʻenau fanongo ki he folofola ʻa e ʻOtuá. ʻOku hangē ʻa e kelekele leleí ko ha kakai ʻoku nau fanongo ki he folofola ʻa e ʻOtuá, maʻu ha mahino, pea talangofua kiate Iá.
Ke akoʻi fekauʻaki mo e founga ʻe tupulaki ai ʻa e puleʻanga ʻo e ʻOtuá, naʻe folofola ʻa Sīsū fekauʻaki mo ha tengaʻi mūsita. ʻOku fuʻu siʻisiʻi, ka ʻoku tupu ia ʻo hoko ko ha fuʻu ʻakau ʻe lava ke nofo ai e fanga manupuná.
Naʻe toe pehē foki ʻe Sīsū ʻoku hangē ʻa e puleʻanga ʻo e ʻOtuá ko e lēvaní pe ʻīsite naʻe fakaʻaongaʻi ʻe ha fefine ʻi he taimi ʻokú ne taʻo mā aí. ʻOku fiemaʻu pē ha kiʻi lēvani siʻisiʻi ke fakatupu ʻa e foʻi maá.
Naʻe fai ʻe Sīsū ha talanoa ʻe taha fekauʻaki mo ha tangata naʻá ne fakatau mai ha ngaahi mataʻitofe. Naʻá ne maʻu ha meʻa naʻe mātuʻaki fakaʻofoʻofa mo mahuʻinga. Naʻá ne fakatau atu ʻa e meʻa kotoa pē naʻá ne maʻú kae lava ke ne fakatau mai ʻa e mataʻitofé. Naʻe fai ʻe Sīsū ʻa e talanoá ni ke akoʻi ʻoku fuʻu mahuʻinga ʻaupito ʻa e ngaahi tāpuaki ʻo e ongoongoleleí pea ʻoku totonu ke tau fai ʻa e meʻa kotoa pē te tau lavá ke maʻu kinautolu.