Ko Saimone mo e Mālohi ʻo e ʻOtuá
Ko e ako fekauʻaki mo e lakanga fakataulaʻeiki ʻo e ʻOtuá
Naʻe nofo ha tangata ko Saimone ʻi Samēlia. ʻI heʻene fanongo ki he ongoongolelei ʻo Sīsū Kalaisí, naʻá ne tui. Naʻá ne ofo foki ʻi he ngaahi mana naʻe fai ʻe he kau ākonga ʻa Sīsuú ʻaki ʻa e mālohi ʻo e ʻOtuá. Naʻe papitaiso ʻa Saimone kae pehē foki ki ha kau tangata mo ha kau fafine kehe tokolahi ʻi Samēlia.
Naʻe fanongo ʻa e kau ʻAposetolo ʻi Selusalemá ki hono papitaiso ʻo e kakai ʻi Samēliá. Naʻe ʻalu ʻa Pita mo Sione ki Samēlia. ʻI hono fakaʻaongaʻi ʻa e mālohi ʻo e ʻOtuá, ʻa e lakanga fakataulaʻeikí, naʻá na hilifaki hona nimá ki he kakai kuo ʻosi papitaisó ʻo foaki kiate kinautolu ʻa e meʻafoaki ʻo e Laumālie Māʻoniʻoní.
ʻI he sio ʻa Saimone kia Pita mo Sione ʻokú na fai ʻení, naʻá ne ʻoange kiate kinaua ha paʻanga peá ne pehē ange, “Foaki mai foki kiate au ʻa e mālohí ni.” Naʻá ne loto ke fakatau mai ʻa e lakanga fakataulaʻeiki ʻo e ʻOtuá kae lava ke ne foaki foki mo e meʻafoaki ʻo e Laumālie Māʻoniʻoní.
Naʻe fakamatala ange ʻe Pita he ʻikai lava ʻe ha taha ʻo fakatau ʻa e mālohi ʻo e ʻOtuá. Ko ha meʻaʻofa ia meiate Ia. Naʻe talaange ʻe Pita kia Saimone ʻoku fiemaʻu ke liliu hono lotó. Naʻá ne fakaafeʻi ʻa Saimone ke fakatomala mo lotu ki he ʻOtuá ke maʻu ha fakamolemole.
Naʻe fakatomala ʻa Saimone. Naʻá ne kole kia Pita ke lotua ia ke tokoni ke ne liliu.