Ko ha Sipi Hē, ko ha Paʻanga naʻe Pulia, mo ha Foha Naʻe Mole
Ko ha talanoa fakatātā ʻe tolu ʻo kau ki he ʻofa ʻa e ʻOtuá
Naʻe mamata ha kau taki ʻe niʻihi ʻo e kau Siú ki he talanoa mo e keinanga ʻa Sīsū mo e kakai naʻa nau pehē ko ha kau faiangahalá. Naʻe fakakaukau e kau takí naʻe ʻikai totonu ke maʻu meʻatokoni ʻa Sīsū mo e kau angahalá. Naʻe fai ʻe Sīsū ki he kau takí ha talanoa pe talanoa fakatātā ʻe tolu ke tokoni ke mahino kiate kinautolu ʻokú Ne finangalo ke tokoniʻi ʻa e tokotaha kotoa pē ke nau fakatomala pea mo ʻEne fiefia ʻi heʻenau fai iá.
Ko e talanoa fakatātā ʻuluakí naʻe fekauʻaki ia mo ha tangata naʻe ʻi ai haʻane fanga sipi ʻe toko 100. Naʻe hē ha taha ʻo ʻene fanga sipí.
Naʻe tuku ʻe he tangatá ʻa e sipi kehe ʻe 99 kae ʻalu ʻo kumi ʻa e sipi ʻe taha naʻe heé. Naʻá ne ʻalu pē ʻo kumi kae ʻoua kuó ne maʻu ia.
ʻI he faifai peá ne maʻu ʻene sipi naʻe heé, naʻá ne fuʻu fiefia ʻaupito! Naʻá ne fua mai ʻa e sipí ki ʻapi ʻi hono umá pea tala ki hono ngaahi kaungāmeʻá mo e kaungāʻapí ke nau fiefia fakataha mo ia. Naʻe pehē ʻe Sīsū ko e ongo ʻeni ʻoku maʻu ʻe he Tamai Hēvaní ʻi he taimi ʻoku fakatomala ai ha taha mei heʻene ngaahi angahalá pea foki kiate Iá.
Ko e talanoa fakatātā hono uá naʻe fekauʻaki ia mo ha fefine naʻá ne maʻu ha paʻanga siliva ʻe 10. ʻI he taimi naʻe puli ai haʻane paʻanga ʻe tahá, naʻá ne tutu ha foʻi teʻelango pea tafi hono falé, ʻo kumi ʻa e paʻanga siliva naʻe molé. Naʻá ne fakasio taʻetūkua kae ʻoua kuó ne maʻu ia.
ʻI he faifai peá ne maʻu ʻene paʻanga siliva naʻe molé, naʻá ne fuʻu fiefia ʻaupito! Naʻá ne talaange ki hono ngaahi kaungāmeʻá mo e kaungāʻapí ke nau fiefia fakataha mo ia. Naʻe pehē ʻe Sīsū ko e ongo ʻeni ʻoku maʻu ʻe he kau ʻāngelo ʻi he langí ʻi he taimi ʻoku fakatomala ai ha taha mei heʻene ngaahi angahalá.
Ko e talanoa fakatātā hono tolú naʻe fekauʻaki ia mo ha tangata naʻe ʻi ai hano ongo foha. Naʻe ʻikai ke toe fie nofo ʻa e foha siʻisiʻí mo ʻene tamaí. Naʻá ne kole ki heʻene tamaí ke ʻoange hono ʻinasi ʻi he paʻanga ʻa e fāmilí he taimi ko iá. Pea mavahe leva ʻa e fohá mei ʻapi ʻo ʻalu ki ha fonua mamaʻo.
Naʻe fai ʻe he fohá ha ngaahi fili kovi ʻaupito. Naʻá ne fakamoleki noaʻia e paʻanga naʻe foaki ange ʻe heʻene tamaí.
Hili e ʻosi kotoa ʻene paʻangá, naʻá ne fuʻu fiekaia ʻaupito. Naʻe ʻikai ke ʻoange ʻe ha taha ha meʻa ke ne kai. Naʻe faifai peá ne maʻu ha ngāue ko hono tauhi ʻo e fanga puaká. Naʻe fuʻu fiekaia ʻaupito ʻa e fohá, pea naʻá ne fakaʻamu ke ne lava ʻo kai e meʻakai ʻa e fanga puaká. Naʻá ne ʻiloʻi ʻoku fiemaʻu ke ne foki ki heʻene tamaí.
Ka naʻe ʻikai ke fakapapauʻi ʻe he fohá pe ʻe talitali lelei ia ʻe heʻene tamaí. Naʻá ne fakakaukau ke ne kole ki heʻene tamaí pe ʻe lava pē ke ne hoko ko ha taha ʻo ʻene kau tamaioʻeikí.
ʻI he lue atu ʻa e fohá ki ʻapí, naʻe mamata mai pē ʻene tamaí kiate ia mei he mamaʻó. Naʻe fiefia ʻaupito ʻa e tamaí, peá ne lele ki hono fohá!
Naʻe fāʻofua ʻa e tamaí ki hono fohá ʻo ʻuma kiate ia. Naʻá ne tala ki heʻene kau tamaioʻeikí ke ʻomi ʻa e vala lelei tahá ki hono fohá mo teuteu ha kātoanga kai. Naʻá ne loto ke fakafiefiaʻi mo fiefia ʻa e tokotaha kotoa pē koeʻuhí he kuo foki mai hono fohá ki ʻapi.
ʻI he taimi kotoa ko ʻení, naʻe ngāue ʻa e foha lahí ʻi he ngoueʻangá. ʻI heʻene foki mai ki ʻapí, naʻá ne fanongo ki he meʻa faivá mo e meʻé. Naʻá ne ʻeke ki ha tamaioʻeiki pe ko e hā e meʻa ʻoku hokó. Naʻe talaange ʻe he tamaioʻeikí kuo foki mai ki ʻapi hono tehiná, ko ia naʻa nau fai ha kātoanga kai ko hono fakafiefiaʻi.
Naʻe ʻita lahi ʻa e taʻoketé. Naʻe fakaafeʻi ia ʻe heʻene tamaí ki he kātoanga kaí, ka naʻe ʻikai ke ne ʻalu. Naʻá ne talaange ki heʻene tamaí kuó ne tauhi kiate ia ʻi ha ngaahi taʻu lahi, ka kuo teʻeki ai ha taha te ne ʻai haʻane kātoanga kai. Naʻe talaange ʻe he tamaí kiate ia, “Ko ia kotoa pē ʻoku ʻaʻakú ʻoku ʻaʻau ia,” ka ʻoku lelei ke fiefia ʻi he taimi ʻoku fakatomala ai ha taha mo foki ki ʻapi!