Ko Hono Fakanonga ʻe Sīsū ʻa e Matangí
Naʻa mo e matangí mo e tahí ʻoku talangofua kiate Ia
ʻI ha ʻaho ʻe taha, naʻe folau ai ʻa Sīsū mo ʻEne kau ākongá ʻi ha vaka ʻi he Tahi Kālelí. Naʻe kamata ke angi mālohi ʻa e matangí. Naʻe kamata ke fasi mai ʻa e ngaahi peaú ki he vaká, ʻo fakafonu vai ia. Ka neongo ia, naʻe mohe fiemālie pē ʻa Sīsū.
Naʻe manavahē ʻa e kau ākongá. Naʻa nau fafangu ʻa Sīsū. Naʻa nau tangi ʻo pehē, “ʻEiki, fakamoʻui ʻa kimautolu.” Naʻa nau fakakaukau te nau melemo ʻi he tahí.
“Ko e hā ʻoku mou ilifia aí?” ko e ʻeke ange ia ʻe Sīsuú. Naʻá Ne folofola ki he kau ākongá naʻe fiemaʻu ke nau maʻu ha tui lahi ange. Naʻá Ne tuʻu hake ʻo folofola ki he matangí mo e peaú, “Fiemālie, pea ke tokalelei.”
Fakafokifā pē kuo tuʻu ʻa e matangí, pea naʻe nonga ʻa e tahí. Naʻe malu ʻa Sīsū mo e kau ākongá. Naʻe ofo ʻa e kau ākonga ʻa Sīsuú. Naʻa nau fifili pe ko hai ha taha te ne lava ʻo fekauʻi ʻa e matangí mo e tahí, pea nau talangofua kiate Ia!