Ko e Hāʻele ʻa Sīsū ki Selusalemá
ʻOku talitali lelei ʻe he kakaí honau Fakamoʻuí
Naʻe mei hokosia e taimi ʻo e Laka Atú, ko ha kātoanga maʻu meʻatokoni mahuʻinga maʻá e kau Siú. Naʻe tokolahi ha kakai naʻe fononga ki Selusalema ki he kātoanga ʻo e Laka Atú. Naʻe ʻalu foki mo Sīsū mo ʻEne kau ākongá ki ai. ʻI he fanongo ʻa e kakaí ʻoku hāʻele mai ʻa Sīsuú, naʻa nau ō ke fakafetaulaki kiate Ia.
ʻI he taimi naʻe ofi atu ai ʻa Sīsū mo ʻEne kau ākongá ki Selusalemá, naʻá Ne kole ange ke nau ʻomi ha ʻasi kiate Ia. ʻI he ngaahi taʻu lahi kimuʻá, naʻe ʻosi tala ʻe ha palōfita ʻe hāʻele mai ʻa e Fakamoʻuí ʻi he loto-fakatōkilalo, ʻo heka ʻi ha ʻasi mui.
Mātiu 21:1–7; vakai foki, Sākalaia 9:9
Naʻe hū atu ʻa Sīsū ki he koló ʻoku heka ʻi he ʻasí. Naʻe fiefia ʻaupito ʻa e kakai ke sio kiate Ia. Naʻa nau talitali lelei Ia ʻo hangē ha tuʻí. Naʻa nau laku ha ngaahi vaʻa paame mo ha vala ʻi he kelekelé ke lue atu ai ʻa e ʻasí. Naʻa nau fakafetaʻi ki he ʻOtuá mo kalanga, “Hōsana: ʻOku monūʻia ʻa e Tuʻi ʻo ʻIsilelí ʻa ia ʻoku haʻu ʻi he huafa ʻo [e ʻEikí].”
Mātiu 21:8–9; Luke 19:36–38; Sione 12:13
Naʻe fifili ha kakai tokolahi ʻi Selusalema pe ko e hā e meʻa ʻoku hokó. Naʻa nau ʻeke ange, “Ko hai ē?” Naʻe tali ange ʻe ha niʻihi ʻo pehē ko Sīsū ʻo Nāsaletí.
Hokó, naʻe ʻalu ʻa Sīsū ki he temipalé. Naʻe fakafetongi ʻe ha kakai ʻe niʻihi ʻa e paʻangá mo fakatau atu ʻa e fanga monumanú ke feilaulauʻi. Naʻe ʻafioʻi ʻe Sīsū ʻoku nau taʻefaitotonu.
Naʻe ʻikai saiʻia ʻa Sīsū ʻi heʻenau maʻu ha paʻanga mei he kakai naʻa nau fie moihū ʻi he temipalé. Naʻá ne kapusi kinautolu ki tuʻa mei he temipalé pea fulihi ʻenau ngaahi palepalé. Naʻá Ne folofola ʻo pehē, “ʻE ui hoku falé ko e fale lotu; ka kuo mou ngaohi ia ko e ʻana ʻo e kau kaihaʻá.”
Mātiu 21:12–13; vakai foki, ʻIsaia 56:7; Selemaia 7:11
Naʻe haʻu ʻa e kakai naʻe kuí pe pipikí kia Sīsū ʻi he temipalé, pea naʻá Ne fakamoʻui kinautolu. Naʻe kalanga ʻa e fānaú “Hōsana,” ʻo fakamālōʻia ʻa Sīsū mo tala ko Ia ʻa e Fakamoʻuí.
Naʻe loto-mamahi ha niʻihi ʻo e kau taulaʻeikí mo e kau tangata tohí ʻi heʻenau mamata ki he meʻa naʻe fai ʻe Sīsuú mo fanongo ki he meʻa naʻe lea ʻaki ʻe he fānaú. Naʻe fakamanatu ange ʻe Sīsū kiate kinautolu ʻo kau ki he potufolofola ʻokú ne pehē ʻe fakahoko ʻe he ʻOtuá ʻa e fakamālō haohaoá mei he ngutu ʻo e kau valevalé.
Mātiu 21:15–16; vakai foki, Saame 8:2