Ko e Falala kia Sīsū Kalaisi ki ha Fakamoʻuí
Fakahaofi ʻi Heʻene ʻaloʻofá
Naʻe kau mai ha kakai mei ha ngaahi feituʻu kehekehe ki he Siasi ʻo Sīsū Kalaisí. Naʻe ui ʻa e kāingalotu ʻo e Siasí ko e Kau Māʻoniʻoni.
Ko e niʻihi ʻo e Kāingalotú ko ha kau Siu naʻa nau kei muimui pē ki he fono ʻa Mōsesé. Naʻe ʻi ai ha niʻihi kehe naʻe ʻikai ke nau muimui ki ai. Naʻe ʻikai ke nau tui tatau pe naʻe fiemaʻu ke nau muimui ki he fono ʻa Mōsesé.
Naʻe ʻiloʻi ʻe Paula naʻe maʻu ʻe he Kāingalotú ʻa e ngaahi fehuʻi ko ʻení. Naʻá ne fai ha tohi ki he Kāingalotu ʻi Lomá. Naʻá ne talaange he ʻikai lava ke fakamoʻui ha taha ʻi heʻene feinga pē ke muimui ki he fono ʻa Mōsesé. Naʻá ne fakamatalaʻi ange, ko kitautolu kotoa ʻoku tau faiangahala. ʻOku fiemaʻu ke tui ʻa e tokotaha kotoa pē kia Sīsū Kalaisi pea muimui kiate Ia, kae lava ke fakamoʻui.
Naʻe akoʻi ʻe Paula naʻe fekauʻi mai ʻe he ʻOtuá ʻa Sīsū Kalaisi ke toʻo kiate Ia ʻetau ngaahi angahalá. ʻOku tau lava kotoa ʻo fakatomala pea fakamolemoleʻi kitautolu mei heʻetau ngaahi angahalá koeʻuhí ko e feilaulau ʻa Sīsuú.
Naʻe akoʻi ʻe Paula ʻoku foaki mai ʻe Sīsū Kalaisi ʻa e meʻafoaki ʻo e fakamolemolé mo e mālohi ke fai ha ngaahi meʻa lelei. ʻOku ui ʻa e meʻafoaki ʻofa ko ʻení ko e ʻaloʻofa ʻa Sīsū Kalaisí, pea ʻokú ne fakafonu kitautolu ʻaki ʻa e ʻamanaki leleí mo e fiefiá. Naʻe pehē ʻe Paula ko e taimi ʻoku tau papitaiso aí, ʻo hangē ko Sīsuú, ʻoku hangē ia hano kamataʻi ha moʻui foʻou ko ha tokotaha muimui ʻo Sīsū.