Moʻui ʻi he Tui kia Sīsū Kalaisi
Ko Ia ʻa e “kamataʻanga mo e ngataʻanga ʻo e tuí”
Naʻe ʻikai faingofua maʻu pē ke hoko ko ha tokotaha muimui ʻo Sīsū Kalaisi ʻi he ngaahi fuofua ʻaho ʻo e Siasí. Naʻe faʻa fehiʻa e kakaí ʻi he kāingalotu ʻo e Siasí pe fakakata ʻaki kinautolu koeʻuhí ko ʻenau tuí. Naʻe loto ʻa Paula ke tokoniʻi kinautolu ke tauhi maʻu ʻenau tui kia Sīsū Kalaisí.
Naʻe faitohi ʻa Paula ki he Kāingalotu Hepelū pe Siú. Naʻá ne akoʻi, ʻoku ʻuhinga ʻa e tuí ke tui mo ʻamanaki lelei ki ha meʻa, neongo ʻoku ʻikai ke tau lava ʻo sio ki ai. Hangē ko ʻení, ʻoku ʻuhinga ʻa e tui kia Sīsū Kalaisí ki he falala kiate Ia mo ʻEne ngaahi talaʻofá, neongo kapau ʻoku teʻeki ke tau maʻu ʻa e ngaahi tāpuaki ʻoku tau ʻamanaki ki aí.
Ke tokoni ki he Kāingalotu Hepeluú ke fehangahangai mo honau ngaahi pole ʻi he tuí, naʻe fakamanatu ange ʻe Paula ha ngaahi talanoa fekauʻaki mo e kakai ʻi he folofolá naʻa nau maʻu ha tui lahi.
Hangē ko ʻení, naʻe fakamatala ʻa Paula fekauʻaki mo Noa. Naʻe folofola ʻa e ʻOtuá kia Noa ke foʻu ha ʻaʻake ke fakahaofi hono fāmilí mei ha lōmaki. Naʻe maʻu ʻe Noa ha tui ke talangofua, kimuʻa ia ʻoku teʻeki ke ne mamata ki he ʻuhá.
Naʻe fakamatala ʻa Paula fekauʻaki mo ʻĒpalahame mo Sela, ʻa ia naʻá na maʻu ʻa e tui ke mavahe mei hona ʻapí koeʻuhí he naʻe talaʻofa ʻa e ʻOtuá te Ne tataki kinaua ki ha feituʻu lelei ange. Naʻá na tui foki ki he talaʻofa ʻa e ʻOtuá ʻe tokolahi hona fāmilí, neongo naʻá na fuʻu motuʻa pea teʻeki ke ʻi ai haʻana fānau.
Naʻe fakamatala foki ʻa Paula fekauʻaki mo e faʻē ʻa Mōsese ko Sokopetí. Naʻá ne maʻu ha tui ke fūfuuʻi ʻa Mōsese, ʻi heʻene kei pēpeé, ke maluʻi ia mei ha tuʻi angakovi.
Naʻe tupu hake ʻa Mōsese ʻi ʻIsipite. Naʻe mei lava pē ke tuʻumālie mo fiemālie. Ka naʻá ne tukuange kotoa ia koeʻuhí he naʻá ne tui ki he ʻOtuá mo ʻEne ngaahi tāpuakí.
Koeʻuhí ko ʻene tuí, naʻe taki ai ʻe Mōsese ʻa e kakai ʻa e ʻOtuá mei he nofo pōpulá. Naʻa nau lue atu foki ʻi he kelekele mōmoa ʻi he Tahi Kulokulá!
Naʻe fakamatala foki ʻa Paula fekauʻaki mo Lēhapi. Naʻá ne maʻu ha tui ke tokoni ki he kakai ʻa e ʻOtuá, neongo naʻe ʻikai ha toe taha ʻi hono koló naʻe tui ki he ʻEikí. Naʻe fakahaofi ʻe heʻene tuí ʻa hono fāmilí.
Naʻe pehē ʻe Paula ʻe lava ke tokoniʻi kitautolu ʻe he ngaahi sīpinga lahi ko ʻeni ʻo e tuí ke tau tui foki kia Sīsū Kalaisi, naʻa mo e taimi ʻoku faingataʻa ai ʻa e moʻuí. Te tau lava ʻo fakatomala mei heʻetau ngaahi angahalá pea tafoki kia Sīsū, ko e “kamataʻanga mo e ngataʻanga ʻo ʻetau tuí.” Naʻá Ne loto-fiemālie ke pekia maʻatautolu koeʻuhí he naʻá Ne ʻafioʻi ʻe ʻomi ʻe Heʻene Fakaleleí ha fiefia lahi mo ha fakamoʻui!