Jisas Kraes Bae I Kambak Bakegen

Visen blong Jon abaot hop long Jisas Kraes

Jon i stap stanap narasaed long Jisas Kraes.

Aposol Jon i bin gat wan spesel visen. Hem i bin luk Jisas Kraes, we i bin soem plante samting long Jon abaot pas mo fiuja. Hem i talem long Jon blong raetem ol samting we hem i luk. Jisas i save Ol Sent oli stap traem bes blong olgeta blong folem Hem. Jisas i wantem olgeta blong gat hop se Hem i gat moa paoa bitim devel long wol ia.

Revelesen 1:1–2, 9–11, 13–15, 19; 2–3

Papa long Heven wetem han blong Hem long solda blong Jisas Kraes.

Long visen blong hem, Jon i luk wan buk we nogat wan i save openem. Afta Jon i luk wan sipsip we i ripresentem Jisas Kraes; Hem i save openem buk ia. Jon i lanem se bifo oli krietem wol ia, Papa long Heven i jusum blong Jisas i kam Sevya blong yumi. Hemia i pat we i moa impoten long plan blong God, mo Jisas nomo i save mekem.

Revelesen 5

Setan mo wan grup blong ol spirit pikinini we oli stap aot long heven.

Jon i luk wan dragon tu we i ripresentem Setan. Setan i no laekem plan blong God. Hem i statem wan wo long heven. Plante long ol spirit pikinini blong Papa long Heven, oli gat fet long Jisas Kraes mo oli jusum blong folem Hem. Be sam long olgeta oli jusum blong folem Setan. From joes blong olgeta, oli mas aot long heven.

Revelesen 12:3–11

Wan pikja we i soem ol solda oli stap maj, ol pipol long nid, mo taem blong hanggri.

Jon i luk se Setan mo olgeta we oli folem hem, oli stap gohed blong faet agensem Jisas mo olgeta we oli stap folem Jisas long wol. Oli traem blong trikim ol pipol blong no biliv long gospel blong Sevya. I gat fulap wo, bigfala trabol, mo siknes.

Revelesen 6; 8–9; 12:17; 13:11–18; 17–18

Enjel Moronae i stap lidim Josef Smit i go long ol buk we oli wokem long gol.

Be Papa long Heven i sendem ol enjel long heven i kam wetem gospel blong Jisas Kraes, blong mekem se oli save serem wetem evriwan long wol.

Revelesen 14:6–7

Sam pipol bae oli biliv long Jisas mo obei long ol komanmen blong Hem, olsem we oli bin mekem long heven. Testemoni blong olgeta abaot Jisas bae i helpem olgeta blong winim wo agensem Setan.

Revelesen 12:11; 19:8–10

Jisas i stap kam daon long heven, wetem ol enjel biaen long Hem.

Jon i luk we Jisas Kraes bae i kam long wol bakegen. Bae Hem i King blong ful wol. Setan bae i nomo gat paoa. From Jisas, bae i nomo gat harem nogud o soa long bodi. Evri pipol we oli biliv long Jisas mo kipim ol kavenan wetem Hem, bae oli laef wetem Hem mo Papa long Heven blong oltaem.

Revelesen 19:11–16; 20:1–2; 21:1–7