Luk 10:25–37
Parabol blong Gudfala Man Sameria
Stap lavem ol neba blong yumi olsem we yumi lavem yumiwan
Wan loya i askem Jisas olsem wanem nao blong kasem laef we i no save finis. Jisas i askem hem wanem nao oli bin raetem insaed long ol skripja. Loya i ansa se skripja i talem blong lavem God mo lavem neba blong yu. Jisas i se yu talem i tru. Afta loya i askem, “?Huia i neba blong mi?” Jisas i ansa long hem taem i talem wan parabol o stori.
Luk 10:25–29
Long parabol ia, wan man we hem i Jiu i stap travel long wan rod long Jerusalem blong go long Jeriko. Kwiktaem nomo, sam stil man oli kam. Oli stilim ol klos blong hem, oli kilim hem i hafded, mo oli lego hem i stap long ples ia.
Luk 10:30
I no longtaem afta wan pris i kam daon long rod. Wan pris i wan man we i wok insaed long tempol. Hem luk man ia long rod be i pas i go narasaed rod.
Luk 10:31
Afta wan nara man we i stap wok tu insaed long tempol we oli singaotem hem wan Livaet. Hem i luk man ia we i kasem kil, be i go pas narasaed rod tu.
Luke 10:32
Afta wan man Sameria i wokbaot i kam. Hem i luk man ia long rod i kasem nogud kil. Ol man Sameria mo ol man Jiu oli no ol gudfala fren. Be man Sameria ia i wantem blong helpem man ia.
Luk 10:33
Man Sameria i lukaot gud man ia i putum oel mo waen long soa blong man Jiu ia. Hem i putum man ia long dongki blong hem.
Luk 10:34
Afta man Sameria i karem man Jiu ia i kam long wan hotel, we bae hem i save spel mo kam gud bakegen. Bifo man Sameria ia i aot long nekis dei, hem i givim mane long man we i lukaotem hotel ia mo talem long hem, “Lukaot gud hem.” Man Sameria i talem se bae hem i kambak long ol dei we stap kam wetem sam moa mane.
Luk 10:34–35
Long en blong stori, Jisas i askem loya blong ansa long wan kwestin. ?Huia i neba blong man we i kasem kil? ?Pris, Man Livaet. O Man Sameria? Loya i talem se, i bin man ia nao we i soem lav long man Jiu ia—Man Sameria. Jisas i askem loya ia blong go mo kam olsem man Sameria ia.
Luk 10:36–37